Hiru hamarkada luzeren ondoren, betirako itxiko ditu ateak Muguruza Ardoak tabernak
'Falcon Crest' izenez ezaguna den San Pedroko taberna-jatetxe mitikoak gaur itxiko ditu ateak. Emozioz eta eskertzez betetako egunak izaten ari dira.
San Pedroko Muguruza Ardoak (Falcon Crest izenez ere ezaguna) taberna-jatetxe mitikoak ateak itxiko ditu gaur, betirako. 1990ko hamarkada hasieratik tragoxka bat hartu edota ederki jateko gune kuttunenetako bat izan denak agur esango die herrikideei. Bereziak izan dira azken aste eta egunak, eta gaurkoa ere memorian iltzatuta geratuko zaien horietako bat izango da, ziur. Pasaiako udal langileak sorpresaz harrapatu dituzte bertan azken egunez lanean ari zirenak, haiei behar bezalako agurra ematera joan dira. Muguruza Ardoak familia osatzen dutenei bertso bat eskaini eta lore sorta bat eman diete.
Ardo biltegi izatetik taberna-jatetxe izatera egin zuen salto Muguruza-k. Maria Luisa Arregi jabeak 1990ko hamarkadan jatekoa eskaintzen hasteko apustua egin zuen, eta ordutik, arrain frijitua edota lapikoan egindako plater goxo bat jateko erreferente bilakatu dira, barrutian, eta barrutitik kanpo ere.
Jarraian, herritar batek bidalitako bideoa:
