Tasen igoeraren kontra bozkatu du PSE-EEk
Zergak igotzeko udalerriko etxeetako ekonomia kontuan hartzea beharrezkoa dela adierazi du taldeak.
Joan den astearteko plenoan, besteak beste, 2025erako Ordenantza Fiskalak onartu zituzten udal ordezkariek (%2,9ko eguneraketa orokorrarekin), EH Bildu eta Podemos taldeen aldeko botoekin. PSE-EE taldeak kontra bozkatu zuen asteartean. Aipatutako igoera horrekin, eta zaborren ordainagiriaren %15eko igoera nabarmenduz, sozialistek diote “pasaitarrek gehiago ordainduko” dutela, baina “zerbitzuak ez direla hobetuko”.
Zergak igotzeko udalerriko etxeetako ekonomia kontuan hartzea beharrezkoa dela gaineratu du taldeak. “Norberak erabakitzen du kiroldegiko zerbitzuak edo ludoteka erabiltzen dituen, baina ez du erabakitzen ekarpena edo zaborrak ordaintzen dituen, horretara behartuta gaude denok”, esan du Lore Suarez bozeramaileak.
Oposizioan zegoenean “zergen eta tasen ordainketa familien diru sarrerekin erlazionatzeko ” eskatzen zuela leporatu diote udal gobernuari, baina orain, ez duela horri buruzko neurririk aurkeztu salatu dute. “Udalak familia behartsuenei zergak eta tasak ordaintzeko zama arintzeko tresnak ditu, eta udal gobernua ezkerrekoa bada, gai hori mahai gainean jarri beharko luke, errenta baxuak dituzten familia gehiagok etekina atera ahal izateko. Pasaian hori zergatik ez zen planteatzen azaltzeko, EH Bilduren eta Podemosen gobernuak ez zuen erantzun nahi izan”, salatu du Suarezek.
Hondakinen kudeaketa tasa %15 handituko da 2025ean, eta zentzu horretan honako gogoeta elkarbanatu du bozeramaileak: “Ingurumena sentsibilizatzeko kanpaina batean 150.000 euro gastatzeko dirua badago, zergak ordaindu ahal izateko ahalegin handia egiten duten pasaitar familiek laguntzeko ere egon beharko luke”.
Kirol arloan adostu diren tasa berriak ere salatu dituzte, batetik, “behar bezala justifikatuta ez zeudelako”, eta bestetik, “Pasaiako kirol taldeak zigortzen dituelako”.
Bukatzeko, esan dute 2023an udal gobernuak “parte hartzea irekiko zuela agindu zuela”, talde guztiek proposamenak egin zitzaten. Bada, hori “materialki ezinezkoa izan dadin epeak egokitzea” leporatu diote udal gobernuari. “EH Bilduk inoiz betetzeko m izan ez duen promesak egiten ditu Pasaian. Akordioak ikuspegi aurrerakoi partekatu batetik egin daitezke, baina alkateak eta egungo udal gobernuak ez dute inolako borondate politiko edo pertsonalik”.
