Martxan da Geuretik Sortuak egitasmoaren hirugarren edizioa
Hilaren 25a arte dute idazle, komikigile, antzerkigile eta zinegileek deialdi berrian izena emateko aukera.
Geuretik Sortuak kultur bekaren hirugarren edizioa abiatzear da; hilaren 25era arte dute idazle, komikigile, antzerkigile eta zinegileek deialdi berrian izena emateko aukera.
2021ean jarri zuen abian Udalbiltzak Geuretik Sortuak egitasmoa “gure herriaren kontakizuna geuretik kontatzeko beharrari erantzuteko, euskaratik eta euskaraz egindako sorkuntza bultzatzeko helburuarekin”. Oiartzungo Udalak ere bat egin zuen egitasmoarekin eta proiektua gauzatu ahal izateko ekarpen ekonomikoa egiteaz gain, sortzaileei haien lanak gauzatu ahal izateko egonaldiko egoitza eskaintzen die deialdi bakoitzeko.
Sortzaileak eta udalerriak harremanetan jarri eta elkarlan horretatik eratorritako istorioak bultzatzeaz gain, hedapena erre bermatzen du bi urteko kultur bekak. Lehenengo urtea sormenerako da; bigarrena, berriz, hedapenerako. Edizio honek 2025 eta 2026 urteak hartuko ditu.
Hirugarren edizioan, berrikuntzak
Lehen edizioa hiru diziplinatara mugatu zen, literaturara, antzerkigintzara eta zinemagintzara. Bigarren aldian komikigintza gehitu zioten. Lehen aldian 26 sortzaile eta bigarrenean 22 hautatu zituzten.
Aurtengo edizioan aipatutako lau alorrak jorratu beharko dituzte parte hartzaileek, eta zenbait berrikuntza aurkeztu dituzte antolatzaileek. Antzerkigintzaren kasuan, gutxienez antzerkigile edo konpainia hasiberri bat hautatu beharko dute –hasiberritzat hartuko da aurretik ibilbide profesionalik izan ez duen pertsona edo konpainia–. “Antzerkigile hasiberrientzako plazak falta dira”, eta Geuretik Sortuak beka “oso tranpolin ona” izan liteke Euskal Herriko plazetara salto egiteko.
Jakin badakite Geuretik Sortuak-ekoek erronka handia dela antzezlan bat sortu eta bira oso bat antolatzea, hori dela eta bidelagun profesional bat izango dute hautatutako pertsona edo konpainia hasiberriek. Gainera, antzerkigile profesionalentzako beka handiagoa izango da aurtengoan.
Gainerako alorretako oinarriak antzekoak izango dira. Deialdia, xehetasuna eta izena emateko prozedura hemen dago ikusgai.
