Palestina artearen bidez babestuko dute
Oiatzungo Udalak, Pagoartek, Alternatiben Oihartzunak, Eskuahaldunak eskultore taldeak eta Palestinari Oiartzunak eragileak zenbait ekitaldi antolatu dituzte datozen egunetarako.
Mikel Kosta. Mina. Palestinari babesa erakutsi nahi dio beste behin Oiartzunek. Konpromiso, inplikazio eta parte hartze handiko herria dela agerikoa da, eta horren adierazle dira hilabete osoan zehar antolatu dituzten ekintzak. Oiartzungo Udala, Pagoarte, Alternatiben Oihartzuna, Eskuahaldunak euskal eskultoreen elkartea eta Palestinari Oiartzuna elkarte zein eragileak batu dira oraingoan, eta hainbat ekitaldi antolatu dituzte han gertatzen ari dena lehen lerrora ekartzeko.
Lehen jarduera martxan da dagoeneko: Genozidioari stop eskultura erakusketa jarri dute ikusgai udaletxeko pleno aretoan, eta hilaren 27ra arte egongo da bertan. Erakusketako sortutako piezek Palestinaren genozidioa islatzen dute.
Hitzordu nagusia, gaur
Gaur (hilak 8) arratsaldekoa da antolatu dituzten hiru jardueren artean garrantzitsuena: Palestinaren aldeko performancea. 17:30ean izango da ikuskizuna, plazan. Palestinako herriaren omenezko antzezpen labur bat izango da, eta bertan keinuz, gorputzaren bidez eta musika lagun dutela Palestinako bonbardaketak antzeztuko dituzte. Euskal Herriko beste herri batzuetan ere egin dituzte horrelakoak.
Palestinako musika jarriko dute bozgorailuetan jendea plazara hurbiltzeko, eta herritarrak elkartzen direnean “bonbardaketa” bat hasiko da; bonben soinuekin jendeak erreakzionatu egingo du. Antzezlana laburra izango dela ohartarazi dute, eta oiartzuarrak izango dira parte hartuko dutenak. Jarraian, Gazatik etorrirako Sol Band musika taldeak kontzertua emango du. Antolatzaileek ekitaldira bertaratzeko deia egin diete herritarrei.
Ekitaldien zerrendako azkena hilaren 14koa (osteguna da) izango da. Ehun urteko gerra Palestinaren aurka liburuaren aurkezpena egingo dute, 19:00etan, pleno aretoan.
Jarraian, Genozidioari stop eskultura erakusketan ikusgai egongo diren pieza batzuk:
Leire Sainz de Aja. Genozidioa.
Koke.
Arantxa Arratibel. Genozidiorik ez.
Iñaki Fernandez Iturmendi.
