Ikuspegi feminista euskal antzerkian txertatzeari buruz hausnartzen
'Euskal Antzerkigintza Feminista Baterantz' topaketa egingo dute hilaren 29an, Oiartzunen. Egun osoko egitaraua osatu dute.
Aurkezpen eguneko irudia. / Ananda Berasarte. Euskal Herriko Antzerkizale Elkarteak (EHAZE) ikuspegi feminista euskal antzerkian txertatzeari buruz hausnartzeko jardunaldi bat antolatu du Oiartzunen. Euskal Antzerkigintza Feminista Baterantz topaketa hilaren 29an izango da, Landetxen. Gipuzkoako Foru Aldundiko Kultura Departamenduarekin, Oiartzungo Udalarekin eta herriko Asanblada Feministarekin lankidetzan sortu dute ekimena.
Jardunaldi honen helburua da euskal antzerkigintzaren egungo egoera ikuspegi feministatik modu kolektiboan aztertzea, antzerki inklusiboagoa eta kontzienteagoa sortzera bideratutako erronkei, gatazkei, beharrei eta indarguneei helduz. “Topaketa hau hausnarketarako eta ekintzarako gune bat da, euskal antzerkigintzan praktika feministak txertatzen jarraitzeko, antzerkiaren esparrua bidezkoagoa eta eraldatzaileagoa izan dadin”.
Nora Velez del Burgo Zalakain, Oiartzungo berdintasun zinegotzia: “Antzerkia tresna oso interesgarria da gaur egungo errealitatea aztertzeko. Jendarte patriarkal batean bizi gara eta ondorioz antzerkigintza ere horren isla da. Arlo hori ikuspegi feminista batetik aztertzea ezinbestekoa da errotutako genero desberdintasunak, botere harremanak eta emakumeen ikusgarritasun eza mahai gaineratzeko. Funtsean, praktika feministak beharrezkoak dira kaleetan, etxeetan eta eszenatokietan, helburu dugun jendarte parekidea lortzeko bidean”.
Irati Baroja Euskal Herriko Antzerkizale Elkarteko arduradunak, bestalde, azaldu du “aspalditik” dabiltzala euskal antzerkigintza ikuspegi feminista batetik eraikitzeko langintzan, eta oraingoan urrats bat gehiago emateko unea dela ikusi dute “aztertuz, gogoetatuz, elkar topatuz eta, batez ere, pentsamendua saretuz. Oiartzungo jardunaldia ahalik eta irekiena eta parte hartzailea izateko moduan diseinatu dugu, hainbat eragilerekin elkarlanean “.
Bestalde, Goizane Alvarez Kulturako diputatuak aipatu du kultura eta arte eszenikoak tresna indartsuak direla “gizartea zalantzan jartzeko eta eraldatzeko”. Gainera, EHAZEk ikuspegi feminista duen antzerkiari buruz egiten duen hausnarketa eta erakusten duen konpromisoa “urrats ausartak eta beharrezkoak” direla gaineratu du, eta gizarte “bidezkoago, berdinzaleago eta kritikoago bat” sustatzen laguntzen dutela esanaz amaitu du bere hitzartzea.
Bertaratzeko izena eman behar da, hemen.
- 11:30. Harrera.
- 12:00. Ongietorri ekitaldia eta gaiaren aurkezpena.
- 12:30. Etenaldia.
- 13:00. Lan saioak.
- Gune feministatik sortzea eta ahalduntzea euskal antzerkigintzan.
- Sareak sendotzea euskal antzerkigintzan.
- Kultura politikak eta euskal antzerkigintzaren egoera.
- Inklusioa euskal antzerkigintzan.
- 14:30. Bazkaria.
- Bazkalostean, goizeko lanak partekatzea.
- 18:00. Mahai ingurua. Euskal antzerkigintza feminista baterantz: zertarako eta nola?
- 20:00. Itxiera Orgasmo taldearen eskutik eta amaierako ospakizuna.
