"Ez dugu horrelako gertaerarik onartzen, ez Pasaian, ez inon"
Mobilizazio jendetsua egin dute gaur iluntzean Trintxerpen, dozenaka eta dozenaka lagunek Pasaiako Mugimendu Feministaren deiari erantzun diote. Irmoki salatu dute atzoko eraso matxista.
Jendetza bildu da Serafin Esnaola plazan. Pasaitarrek irmoki erantzun diote atzo eguerdian herrian izandako eraso matxistari. Goizean bezalaxe, arratsaldean ere jendetzak erantzun dio Pasaiako Mugimendu Feministak deitutako mobilizazioarekin, dozenaka eta dozenaka pasaitarrek euren haserrea kalera atera dute. Serafin Esnaola plazan elkarretaratze jendetsua egin dute.
Lehenik eta behin, elkartasun eta babes osoa adierazi diote erasoa jasan zuen emakumeari: “ez dugu horrelako gertaerarik onartzen, ez gure udalerrian, ez inon, ezta haien erakunde, elkarte eta herritarrengan ere”, esan dute. “Gaitz sozial” hori salatu eta borrokatzeko lanean jarraituko dutela adierazi dute gaurkoan, “emakumeen bizitzak erdigunean jartzea lortu arte, sistema heteropatriarkal, kapitalista eta kolonialak sortzen duten indarkerietatik eta botere harremanetatik libre”. “Gora borroka feminista” oihu eta txalo artean bukatu dute gaurko mobilizazioa.
Atzo eguerdian izan zen eraso matxista. 35 urteko gizon bat bere bikotekidea hiltzen saiatu zen, laban batekin erasotu zuen emakumea euren etxebizitzan. Segurtasun Sailak emandako informazioaren arabera, 12:50ak aldean bertaratu ziren ertzainak, Arrandegi kaleko etxebizitzan. Bertan, gizonak emakumea lepotik zuen helduta esku batekin, eta bestean labana handi bat zuen. Agenteek erasotzaileari aurre egin zioten, eta unean atxilotu zuten. Emakumea Donostiako ospitalera eraman behar izan zuten, zauri oso larriak eragin baitzizkion erasotzaileak.
Erasotzailea ertzain etxera eraman zuten, “genero indarkeria esparruan hilketa egiten saiatzea” leporatuta. Epailearen esku utzi dute jada.
Udalak eta aldundiak ere gogor salatu dute atzoko erasoa. “Gertakari honek berriz ere agerian utzi du jendarte parekidea eraikitzeko gizonen eta emakumeen arteko botere harremanak gainditu egin behar direla”, esan du, udalaren izenean, Laura Ré zinegotziak gaurko elkarretaratzean. Aldundiak ere erasoa arbuiatzeko adierazpena kaleratu du gaur: “Pertsonen duintasuna bermatzea, sexu askatasuna eta osotasun fisikoa errespetatzea, eta gizonen eta emakumeen arteko berdintasuna praktikara eramatea eskubide bortxaezinak dira, eskubide horien aurka egiten duten jokabideek ez dute lekurik gure gizartean”, esan dute hedabideei bidalitako oharrean.
Jarraian, HITZAk gaurko mobilizazioan ateratako zenbait irudi:
