Asteburu honetan jarriko diote ginga 26. Ikuska-ri
Aurtengo film laburren erakustaldiko lehen asteburuan Emea eta Anitza sariak banatu zituzten. Larunbatean izango da sari banaketa nagusia.
Joan den larunbateko sari banaketaren irudia. Joan den asteburuko emanaldi eta saioen ondoren, asteburu honetan jarriko diote ginga Ikuska Pasaiako Badiako Film Laburren Nazioarteko Erakustaldiaren 26. edizioari. Askotariko proiekzioak izaten ari dira joan den hilaren 15etik, orotara, 27 lan aurkeztu dira aurten. Larunbatean jakinaraziko dute aurtengo onenak zeintzuk izan diren.
Larunbatean sari banaketa nagusia izango bada ere, aurreko asteburuan ere omenaldi eta aitortzarako tartea izan zen. Emea eta Anitza saioa egin zuten larunbatean, izen bereko sariak banatu zituzten. Averix taldeak dantza ikuskizun ederra eskaini zuen sari banaketa ekitaldiari hasiera emateko. Josu Elberdinek musika jarri zion galari, eta Luisma Laboak egin zituen aurkezle lanak.
Aurten, berritasun gisa, Oarsoaldeko emakumeen taldeei zabaldu zaie Emea eta Anitza Saria. Guztira, zazpi film labur hautatu zituzten emakumeen taldekoek eta beraiek aukeratu zituzten saridunak. Bi film saritu zituzten larunbatean: Sandra Gallego eta Pilar Gomezen Colorado (lehen saria) eta Juli Suarezen Por qué volvías cada verano filma (bigarren saria). Adinkideko Kakorratz taldearen eskutik artisau opari bat jaso zuten bi zuzendariek.
Aurtengo ekitaldiari bukaera biribila emateko intrigako eta beldurrezko film laburren proiekzioak egingo dituzte ostiral gauean. Larunbatean, berriz, sari banaketa egingo dute, 19:00etan, Trintxerpeko alkateordetzan. Egitarau eta informazio guztia, lotura honetan kontsulta daiteke.
Larunbatean, paraleloki, eskualdeko beste herrietan ere zenbait proiekzio izango dira. Errenteria-Oreretan, Oiartzunen eta Lezon izango dira horiek. Lehena euskaltegiko ikasleei eskainiko diete, Errenteriako Niessen aretoan 10:00etan. Egun berean arratsaldeko 18:00etan bigarren filma proiektatuko dute Oiartzungo Landetxe Auditorioan. Lezokoa asteartean egin zuten.
Kategoria ezberdinetako sarietan 6.600 euro banatuko dituzte guztira.
