Energia aholkularitza zerbitzu berria du Pasaiak
Bulego berri bat ireki dute Trintxerpeko merkatuaren eraikinean. Asteartero izango da zabalik.
Pazos eta Alberro, bulegoko espezialista batekin. Atzotik (hilak 19), energia aholkularitza zerbitzu integrala eskainiko duen bulego berri bat du Pasaiak. Trintxerpeko merkatuaren eraikinean kokatu dute bulego berria, udaleko eta Oarsoaldeko Energia Bulegoak elkarlanean jarri dute martxan zerbitzua. Udaleko iturrien arabera, bulego honen bidez “energia kontsumoaren kudeaketan eta beren etxeetako eraginkortasunaren hobekuntzan” lagundu nahi diete pasaitarrei.
Asteartero izango da zabalik bulegoa. Bertan, honako gaien inguruko aholkularitza pertsonalizatua eskainiko diete herritarrei: fakturak interpretatzea eta kontsumoa aztertzea; energia tarifei eta dauden laguntzei buruzko informazio eguneratua; etxean energia eraginkortasuna eta energia berriztagarrien erabilera hobetzeko aholku praktikoak; eta berrikuntzak energia legerian, eta energia gaiei buruzko prestakuntza jasotzeko aukerak.
Pasaitarrei “informazio eskuragarri eta praktikoa” eman nahi diete zerbitzu honekin, “pertsona bakoitzak erabaki informatuak hartu eta bere energia kontsumoa murriztu ahal izan dezan, ohiturak egokituz eta tarifa egokienak aukeratuz”, udaleko iturrien arabera.
Bulego honetan teknikari espezializatuak ariko dira lanean, asteartero, 9:00etatik 14:00etara eta 14:30etik 16:00etara. Hitzordua aldez aurretik hartzea gomendatu du udalak, “arreta arinagoa emateko” asmoz.
Teo Alberro alkateak “doako baliabide hau erabiltzera” gonbidatu ditu pasaitar guztiak. Iraitz Pazos Ingurumen zinegotziak ere bide beretik jo du eta ziurtatu du bulego honen bidez etxeko eraginkortasun energetikoa aurrezteko eta hobetzeko “beharrezko laguntza” emango dutela, “ingurumena babesten ere lagunduz”.
Informazio gehiago jasotzeko 943 34 41 60 telefonora hots egin daiteke. Bestela, helbide honetara idatzi daiteke.
