Esti eta Mikel Markezek itxiko dute aurtengo Kontu Kantari
Abenduaren 1ean kontzertu berezia eskainiko du bikoteak Antxon. "Modu natural eta biluzian" aurkeztuko direla aurreratu du Kultura sailak.
Esti eta Mikel Markez. Hiru emanaldi arrakastatsu eskaini ondoren, hurrengo igandean (abenduak 1) emango diote bukaera aurtengo Kontu Kantari Pasaiako Solasaldi Musikatuen zikloari. Esti eta Mikel Markez musikarien emanaldiarekin biribilduko dute lehen edizioa, ginga jarriko dio bikoteak. Antxon izango da emanaldi berezia, Kultur Etxean. 19:00etan hasiko da.
Aita-alabek kontzertu berezia eskainiko dute, “modu natural eta biluzian” aurkeztuko direla aurreratu du Brionek. Ibilbidean izeneko ikuskizuna taularatuko dute. Azken urteotan elkarrekin ezagun egin dituzten abestiak eta bakoitzaren bakarkako lanak interpretatuko dituzte: “Estiren kantu garaikide eta freskoak, eta Mikelen klasiko eta hunkigarriak”.
Ahotsa eta gitarra besterik ez du erabiliko bikoteak, eta abestiak “antzinakoak, egungoak eta etorkizunerako keinuz betatakoak” izango direla aurreratu dute. Kontzertuan zehar, bertaratutakoekin lanaren nondik norakoak, sorkuntza prozesuak edota etorkizuneko proiektuak partekatuko dituzte. Oihana Maritorena aktoreak gidatuko du solasaldi musikatua.
Brionek esan du Kontu Kantari “Pasaiako kultur egutegiko ezinbesteko hitzordu bihurtu” dela, aurreko hiru emanaldiek “harrera beroa” izan zutela aitortu du, “herriko bazter guztiak musikaz eta emozioz bete baitituzte, ekimen honen sustrai sakonak erakutsiz”. Harrotasuna adierazi du udalaren izenean egitasmoak urte honetan izan duen ibilbideagatik. Datorren urterako beste edizio bat prestatzen hasi dira jada, hori aurreratu du. Aurki emango dute horren berri, baina orain “gero arte esteko garaia” dela esan du Brionek: “Eskerrik asko ekimen honi egin diozuen harreragatik”.
Sarrerak dagoeneko eros daiteke, 5 euroan, lotura honetan.
