Azaroaren 25ari lotutako ekitaldiak, martxan
Bihar Irantzu Varelaren bakarrizketa izango da Gezalan, igandean musika eskolakoen emanaldi ibiltaria, eta astelehenean bi deialdi arratsalderako.
Zapata gorriak, Kultura Aretoaren atarian. Abian dira Lezoko eragileek eta udalak Indarkeria Matxistaren Kontrako Egunaren harira antolatutakoak. Lehen ekitaldia hilaren 9koa izan zen, Gezalan klown-bertso saioa egin zenekoa. Gainerakoak datozen egunetan izango dira, Azaroaren 25a izaki egunik oparoena.
Hala, bihar (ostirala) Irantzi Varelak bakarrizketa egingo du Gezala Auditoriumean, 20:00etan hasita: Manólogo izenburupean, umorez landuko ditu emakumeak zapaltzen dituztenen gainekoak. Igandean, ostera, Tomas Garbizu Musika Eskolak txistulariek kalebuelta egingo dute, 11:00etatik herritik zehar.
Azaroaren 25erako bi deialdi. Indarkeria Matxistaren Kontrako Eguna da. 19:00etan, Bekoerrota kiroldegitik abiatuta, bortxa matxistari ezetz esango diete herriko korrikalariek, Emakume korrikalari morea jardueraren bitartez. Ondoren, 19:30ean hasita, Azaroaren 25eko mobilizazio edo ekintza nagusia era berritzailean egingo dute, kantu jira formatuarekin zeharkatuko dituztelako herriko kaleak Tomas Garbizu Musika Eskolako Sutargi abesbatzaren eta trikitixa taldearen doinuekin.
Horik ekitaldi zehatzak. Edonola ere, egitarauaren antolaketan izan direnek deialdi iraunkorra egin diete lezoarrei: hilaren 26ra arte herriko denda, atari eta balkoietan zapata eta zapi gorriak jar ditzatela.
