Nazioarteko Txotxongilo Jaialdiaren 30.urteurrena
Hilaren 25etik 29ra Juanba Berastegi aretoan haurrentzako txotxongilo emanaldiak izango dira, Nazioarteko Txotxongilo Jaialdiaren 30.urteurrenaren harira
Nazioarteko Txotxongiloen Jaialdia Datorren astean, hilaren 25etik 29ra txotxongilo emanaldiak izango dira, Nazioarteko Txotxongilo Jaialdiaren harira. Aurten, jaialdiaren 30. urteurrena da eta Frantziatik, Italiatik, Murtziatik eta Malagatik etorritako antzerki konpainiek hartuko dute parte. Ekimena Pasaiako Udaleko Haur, Nerabe eta Gazteen Sustapen Sailak antolatua da, Tolosako Ekinbide Etxearen laguntzarekin. Emanaldiak goizez izango dira, ikastetxeetako haurrei zuzenduta baitaude: Lehen Hezkuntzako 2., 3., 4., 5. eta 6. mailako ikasleak joango dira, eta 700 haurren parte-hartzea espero da.
Julen Rodríguez Haur, Nerabe eta Gazteen Sustapeneko zinegotziak azpimarratu duenez, udalari funtsezkoa iruditzen zaio haur eta nerabeek teknologia berriak alde batera utzi eta entretenimendua modu tradizional batean gozatzeko aukera izatea, kasu honetan, eskuz eginiko txotxongiloen bitartez.
Egitaraua honakoa da:
Hilaren 25, astelehena: ‘L’Ainea’ konpainia frantsesaren hitzik gabeko istorio laburrak: Poltsa handiko otsoa, Sisifo txikia eta Edipo.
Hilaren 26, asteartea: ‘Di Filippo’ konpainiaren Caperucita roja.
Hilaren 27, asteazkena: ‘Di Filippo’ konpainiaren Variations.
Hilaren 28, osteguna: Murtziako ‘La Tendía’ konpainiaren La isla de las cosas perdidas.
Hilaren 29, ostirala: Malagako ‘Ángeles de trapo’ konpainiaren Error 404.
