San Pedroko lonja berritu eta modernizatzeko lanekin hasi dira
Proiektuaren azken faseko lanak hasi berri dituzte. 14 hilabeteko epean bukatzea aurreikusi dute.
Pasaiako lonjaren instalazioak berritzeko eta modernizatzeko lanak azken txanpan sartu dira, azken faseko lanak hasi berri dituztela jakinarazi du Pasaiako Portuko Agintaritzak. Construcciones Amenabar S.A. enpresa arduratuko da lan horietaz.
Orotara, 14 hilabetez ariko dira lanean. Proiektua bukatuta, 5.000 metro koadro gehiago izango ditu lonjak beheko solairuan (arrantza jarduketarako) eta 1.500 metro koadroko espazio gehiagarria izango du sotoan. Sotoaren azalera osoa, beraz, 6.232 metro koadrokoa izango dela jakinarazi dute, eta beheko solairua 15.525 metrokoa, agintaritzako iturrien arabera, “egungo espazioa puntako instalazioekin handituz”.
Honako jarduketak egingo dituzte datozen hiletan: egungo argiztapenaren ordez LED teknologian oinarritutako sistema eraginkorragoak jarriko dituzte; zoladura jarri, suteen aurkako babes instalazioa modernizatu edo itsas geotermian oinarritutako klimatizazio sistema abiarazi. Lan hauei esker, “badiako uraren tenperatura konstantea aprobetxatuko” dela gaineratu dute iturriek, “urte osoan zehar behar den hotza sortzeko”.
Horrez gain, sotoko aparkalekura zuzenean sartzeko bigarren karga jasogailu bat eraikiko dute, baita kontsumo elektriko telematikoak kontrolatzeko sistema bat ere. Gainera, arraina eraldatzeko gela bat jarriko dute “arrantza jarduera hobetzeko” asmoz. Bukatzeko, enkante elektronikoa sartzeko beharrezko aurre instalazioak ere egingo dituztela iragarri dituzte.
David Candelario PPAko zuzendariak honakoa esan du: “Jarduera guztien helburua da, arrantza euskal ekonomiarentzat eta gizartearentzat funtsezkoa den jarduera moduan indartzea, eta gure posizioa sendotzea, Pasaiako lonja Estatuko portu sistemaren barruan hirugarrena baita garrantziari dagokionez”.
Proiektura 5.766.375,59 euro bideratuko dituzte. Europar Batasunak milioi euro bat jarriko ditu.
