Garaikur berria hautatzeko lehiaketa abiatu du Oarsoarrak Euskararen Sariak
Aurtengoa Oarsoarrak Euskararen Sariaren "inflexio puntua" izango dela azaldu dute, "2025eko ekitalditik aurrera, bi urtetik behin egingo da eta garaikurraren berrikuntzarekin aldi berri bati eman nahi diogu hasiera".
Agerraldia egin dute gaur lehiaketaren berri emateko. Oarsoarrak Euskararen Sariaren garaikur berria hautatzeko lehiaketa martxan jarri du Oarsoaldeko Euskara Batzordeak. Hori horrela, etenaldia egingo du aurten sariketa horrek, izan ere, garaikur berria hautatzeko baliatuko du etenaldia. Deialdia, Oarsoaldeko artista guziei zuzendu die sariaren antolatzaileak, eta horiek, ostiraletik aurrera izango dute aukera lanak aurkezteko. Lehiaketara aurkeztuko diren lanak, arte plastikoetako edozein diziplinetakoak izan daitezke, eta euskara eta eskualdea, Oarsoaldea, iradoki beharko ditu, nolabait, sortzaileak.
Lanak bozeto gisa aurkeztu beharko dituzte parte hartzaileek lehiaketara, eta hautatua denak, 2025eko apirilaren 11tik urriaren 6ra arteko epean egin beharko du pieza.
Lanak aurkezteko epea, hilaren 29an hasi eta 2025eko martxoaren 14ko 14:00etan bukatuko da. Lanak jasotzeko epea zabaldu eta bi hilabetera zortzi lan baino gehiago aurkeztu ez badira, Euskal Herri osora zabalduko dute lehiaketaren geografia eremua. Irabazleak 2.500 euro jasoko ditu, “sari horrek gain hartzen ditu obra sortzeko gastuak, esklusibitatea eta ordainsaria”. Hautatutako artelana izango da 2025eko azaroaren 28an egingo den Oarsoarrak Euskararen Sariaren garaikurra. Oinarriak kontsultatzeko, egin klik hemen.
Gaur egin dute agerraldia Oarsoaldeko udaletako euskara zinegotziek eta Oarsoaldeko Euskara Batzordean parte hartzen duten eragileek Koldo Mitxelenaren omenezko eskulturaren gerizpean. Eskultura berriaren gainekoak azaldu dituzte, baina beste jakinarazpenik ere egin dute agerraldi horretan: aurrerantzean bi urtetik behin egingo dute Oarsoarrak Euskararen Saria.
2010ean jarri zuten martxan Oarsoarrak Euskararen Saria proiektua Errenteria, Lezo, Oiartzun eta Pasaiako udalek, Oarsoaldeko Euskara Batzordearen bidez, Sariaren xedea, berriz, euskararen normalizazioaren alde urrats esanguratsuak egin dituzten Oarsoaldeko eragileen lana aitortzea dute helburu. Lehenengo ekitaldian Juanba Berasategi eta ABB Niessen lantegiko euskara batzordea izan ziren sarituak. Hortik aurrera, besteak beste, Asier Altuna eta Telmo Esnal zinegileak; Banaiz Bagara elkartea; Peio Jauregi ikerlaria, Izaskun Madariaga, Agustina Pontesta eta Lurdes Sistiaga andereñoak; Mikel Astarloza txirrindularia; Labore Oarso, edo Antton Valverde abeslaria izan dira sarituak.
Aurtengoa Oarsoarrak Euskararen Sariaren “inflexio puntua” izango dela azaldu dute, “2025eko ekitalditik aurrera, bi urtetik behin egingo da eta garaikurraren berrikuntzarekin aldi berri bati eman nahi diogu hasiera”.
