Gaintxurizketako behin-behineko pasabidea, aurrera
Pasabidea egiteaz gain, ibilgailuen abiadura muga kilometroko 70 ordura jaitsiko dute, eta bideetako bati 300 metro kendu, oinezkoentzako.
Urri hasierako bizilagunen mobilizazioa. Jakina zena ofizial egin du gaur Gipuzkoako Foru Aldundiak: gobernu kontseiluak baimendu du Gaintxurizketan, Gi-636 errepidean, oinezkoentzako behin-behineko aldamio egiturako pasabidea egitea, baita horretarako aurrekontua adostu ere: 412.127,34 euro. Horrez gain, tarte horretan ibilgailuen abiadura muga orduko 70 kilometrora jaitsiko dute, eta seinalizazioa indartuko da. Gainera, Iruneranzko norabidean dauden bi bideetatik auzotik hurbilen denari 300 metro kenduko dizkiote, hormigoizko babes-hesiak jarriz oinezkoentzat izan dadin. Behin lanak esleitzen direnean, horiek egingo dituen enpresak lau hilabeteko epea izango du aldi baterako oinezkoen zubia egiteko.
Gaur eman ditu datuok aldundiak, Irune Berasaluze foru bozeramailearen agerraldian. Berretsi du gaur esandakoak “konponbide zabalgo baten lehen urratsa” direla, behin betiko soluzioa Eusko Trenbide Sarearekin eta Lezoko Udalarekin garatzen ari delako foru erakundea: “Azken helburua da azpiegitura iraunkor bat sortzea, bai bide segurtasuna bai eta oinezkoen irisgarritasuna hobetuko dituena”. Beraz, oinezkoek errepidea zeharkatzeko dituzten segurtasun arazoekin bukatzeko neurrien artetik lehena izango da aurki aktibatu dena.
Berasaluzek aipatu du behin betiko pasabidearen onuradun, batez ere, Perreneko bizilagunak eta inguruan dauden enpresetako langileak izanen direla.
