Klima eta Energia plana osatu du udalak
Oiartzungo Udala buru-belarri ari da lanean klima aldaketari aurre egiteko, eta bide horretan, 2030erako herri bezala lortu beharreko erronkak zehaztu ditu.
Azken 40 urteetan 1,2 gradu igo da Oiartzungo batez besteko tenperatura, eta prezipitazio kopuruak behera egin du. Bizi eta kontsumo ohiturak aldatuko ez balira, mende amaierarako 4,5 gradu igoko litzateke tenperatura, eta bero boladak, lehorteak eta gau tropikalak ere ugaritu egingo lirateke. Urtean 22,2 euri egun gutxiago egingo lituzke, eta prezipitazio handiko egun gehiago eta uholde arrisku handiagoa egongo litzateke herrian.
Mugikortasun ereduan aldaketa sakonak bultzatzea eta energia trantsizioan zein elikadura burujabetzan pauso sendoak ematea ezinbestekoa da ondorio horiek gutxitzeko. Eta, Oiartzungo Udala klima aldaketaren aurka ari denez lanean, Klima eta Energia Plana ondu du.
2030. urterako energia eta kliman herri bezala lortu beharreko erronkak eta ekintzak zehaztu ditu udalak, eta abiapuntua ezagutzeko diagnosi bat egin dute herrian. Bertan ikusi dutenez, 2010etik %13 igo da herriko energia kontsumoa, eta herrian sortutako gasak %3 handitu dira.
Azterketa sakon bat egin ostean, ondorioztatu dute berotegi efektuko gasen isurketaren erantzule nagusia bizilagunak mugitzen diren modua dela. Zehatzagoak izate aldera, garraiobide kutsakorrak eta autoak erabiltzeagatik 53.000 tona CO2 isurtzen dira urtean Oiartzunen, kopuru osoaren %61. Emisioen %16 zerbitzuen sektoreak sortzen du; etxebizitzetako gas eta elektrizitate kontsumoak %9; industriak %6 eta lehen sektoreak %4.
2030. urtea, jomugan
Udalak egin duen planean energia burujabetzan aurrerapausoak eman eta klima larrialdiari aurre egiteko proposamenak jaso dituzte, eta, besteak beste, 2030erako berotegi efektuko gas isurketak %40 murriztea eta sortzen den hondakin kopurua %15 jaistea lortu nahi dute.
Herri jasangarria eta arduratsua lortzeko 64 ekintza adostu dituzte, eta lau ardatz estrategikotan banatu dituzte horiek: Oiartzungo sektore ezberdinetan energia eraginkortasuna bultzatu eta berriztagarrien erabilpena sustatzea; klima aldaketa arintzen laguntzen duen herria lortzea; klima aldaketaren inpaktuen jarraipena egiten duen eta beharrezko konpromiso klimatikoa erakusten duen herri erresilientea erdiestea; eta energia trantsizioan udal eredugarria izatea.
Era berean, Elorsoro kiroldegian 150 kWp-ko instalazio fotovoltaikoa egiteko lanak bukatu ditu udalak, eta autokontsumorako elektrizitate berriztagarria sortzeko erabiliko du kiroldegiko teilatuaren azalera. Elorsoro da herriko instalazio publikoen artean energia gehien kontsumitzen duen instalazioa; herriko argiteria eta eraikin publikoetako kontsumo osoaren %37. Trantsizio energetikorako planean urrats garrantzitsua da hori; izan ere, orain arte martxan jarri duen instalakuntza berriztagarri handiena da. 336 plaka jarri dituzte 741 metro koadroko eremu batean, eta, orain, kiroldegiko elektrizitatea tokian bertan eta modu garbian sortuko da.
Ikusi hemen Elorsoroko instalazio berriztagarriaren bideoa.
