Hiru eguneko dolua ezarri du udalak
Atzoko hilketa matxistari "herri bezala" erantzutera deitu du udalak. Talde guztien izenean adierazpen bat kaleratu dute.
Atzo Antxon izandako hilketa matxista erabat gaitzetsi eta “saminik sakonena” adierazi du Pasaiako Udalak. Erakundeak jakinarazi du hiru eguneko dolua ezarri duela, gaurko 00:00etatik astearteko 23:59era bitarte, biak barne. Ondorioz, betan behera utzi ditu egun horietarako aurreikusitako ekitaldi guztiak.
“Bizi duguna, eta bizitzen ari garena, oso lazgarria da, eta gure herrian eragindako kolpea, oso gogorra. Indarkeria matxista lehen mailako gaitza da. Jendarte osoari eragiten dio, egunero dugu horren berri, eta gaur gertatutakoa horren adibide garbia da”, esan du erakundeak, ordezkaritza duten talde politiko guztien izenean. Babesa eta elkartasun oso adierazi diote emakumearen senideei, eta “egoera gertutik bizi izan duten herritarrei”. Udal baliabideak haien eskura jarri ditu udalak.
“Herri bezala” erantzutera deitu dute, eta hala, gaur eguerdirako Pasaiako Mugimendu Feministak deitutako elkarretaratzearekin bat egin du udalak. 12:00etan bilduko dira herritarrak, Antxoko Biteri plazan.
“Udalak herrian bizi diren pertsona guztien eskubideak bermatzeko ardura du. Eta, beraz, ahalegin horretan jarraituko dugu, egunero kolpatzen gaituen indarkeria matxistaren kontrako lanean”, erantsi dute.
Atzo arratsaldeko 16:00ak inguruan 53 urteko gizon bat atxilotu zuten Pasaiako etxebizitza batean bikotekide ohia suzko arma batekin hiltzea egotzita.
Pasaiakoa Euskal Herrian aurten izan den zazpigarren hilketa matxista izan da.
