Oiartzungo Udala: "Olatu berria sortzeko unea orain da"
Euskararen eguna dela eta, adierazpen instituzionala onartu dute Oiartzungo Udaleko EH Bildu eta EAJko udal taldeek.
Euskararen Nazioarteko Eguna da gaur, eta, horren garira, adierazpen instituzionala onartu dute Oiartzungo Udaleko EH Bildu eta EAJko udal taldeek.
“Euskararen biziberritze prozesuak susperraldi egoera bizi izan du azken hamarkadetan, baina badira urte batzuk euskararen egoera bidegurutzean dagoela entzuten hasiak garela. Euskararen gaur egungo egoera zein den ulertzeko Iñaki Iurrebasoren doktore tesiak proposatutako ikuspegi berriak edota Euskaltzaindiaren gogoeta guneak ere argi erakutsi eta adierazi dute jauzi sendoak emateko unea iritsi zaigula”. Honela dio adierazpenaren lehen zatiak.
Euskara bi hizkuntza hegemonikorekin talka egoera dagoen hizkuntza gutxitua dela diote gero, eta, beraz, aldeko hizkuntza politikak egitea ezinbestekotzat jotzen dute euskarari eusteko. Halaber, globalizazio egoerak, aldaketa demografikoek eta digitalizazioak, besteak beste, hizkuntza gutxituak indarberritzeko aukerak oztopatzen dituela diote; ondorioz, gehitu dute “euskararen egiturazko arazoei heltzeko azken aukera” izan daitekeela. “Jauzi berria emateko unea da, aurrerantz egiten ez badugu atzerantz egingo dugulako”, jarraitu dute.
Datuak ere txertatu dituzte adierazpenean. Euskal herritarren %13k erabiltzen du euskara erdarak baino gehiago; %8 aritzen da euskaraz erdaretan baino errazago; eta, transmisioari erreparatuz gero, Hegoaldeko haurren %17k jaso du etxean euskara nagusitasunez. Era berean, euskal herritarren %4 soilik bizi da euskara nagusi den eremuetan. “Gune horiek ahultzen ari zaizkigu. Horrenbestez, ELEN Europako Hizkuntza Gutxituen sareak eta Euskalgintzaren Kontseiluak adierazi berri duen bezala, guk ere euskara larrialdi linguistikoan dagoela adierazi nahi dugu”.
Eta ez hori bakarrik; EH Bildu eta EAJko udal taldeek nabarmendu dute epaitegietatik euskararen aurkako neurriak hartzen jarraitzen dutela eta “gure hizkuntzaren aurkako oldarraldian murgilduta jarraitzen dugula”.
Hortaz, euskararen aldeko neurriei “tinko” heltzeko deia egin dute. Hori dela medio, gehitu dute eginkizun horretan “berebiziko garrantzia” dutela arnasguneek eta udalerri euskaldunek “horiek erakusten dutelako posible dela euskaraz bizi den herria. Guk erantzukizun hori geure egiten dugu, eta konpromisoa hartzen dugu zeharkako hizkuntza politika aurrerakoiak indartzeko”.
Eta honela amaitu dute adierazpena. “Azken hamarkadetan euskara mantentzeko eta zabaltzeko gai izan bagara, aurrerantzean ere horretan jarraitzeko bizi indarra izango dugu. Olatu berria sortzeko unea orain da, eta olatu horren eragile izango da udala ere”.
