"Etxeko langileok ez gara errealitate latz horretatik kanpo geratzen"
Leonorren lankide zirenek elkarretaratzea egin dute gaur arratsaldean Antxon. Justizia exijitu dute, baita hiltzailea "legearen pisu guztiarekin zigortzeko" ere.
Etxeko langileen protestan ateratako irudi bat. Leonorren lankide izan direnek, minduta eta haserre, elkarretaratzea egin dute gaur arratsaldean Antxoko San Fermin elizaren parean. Haiekin batera zenbait herritar izan dira, haiek ere SOS Arrazakeriako Etxeko Langileen Taldeak egindako deiari erantzun diote. Antxoko hilketa matxista salatu eta Leonorren “maiteei eta batez ere bere bi alabei” elkartasun eta babes osoa helarazi diete.
Leonor “emakume ausarta” zela esan dute gaurko mobilizazioan, “bere herrialdetik, Kolonbiatik, gutako asko bezala, emigratu zuena, berarentzat eta bere familiarentzat etorkizun hobe baten bila”. Pertsona “maitagarria” zela erantsi du haren lankide izan zen batek, “arduratsua eta oso alaia, bere alabak biziki maite zituena. Bere bizitza bidegabe eten zen, indarkeria matxistaren beste biktima askorena bezala”, esan dute, amorruz.
Etxeko langileak, indarkeria matxista den “errealitate latz” horretatik ez daudela salbu esan dute, eta haietako askok ere erasoak pairatu dituztela “emakume izate hutsagatik”. “Batzuek tratu txarren egoeretatik ihesi emigratzen dugu, eta askok hemen ere aurre egin diegu egoera horiei, gure lanetan. Leonorren kasuan bezala, gure familia eta lagunekiko distantziak zaurgarriago egiten gaitu. Gure batasunak bakarrik, elkartasun sareen bidez, emango digu beharrezko indarra zailtasunei aurre egiteko eta garena baino indartsuagoak izaten jarraitzeko”, erantsi dute, amorruz.
Leonorrentzat justizia exijitu dute, baita hiltzailea “legearen pisu guztiarekin zigortzeko”. Erakunde publikoei “baliabideak eta bitartekoak” eskatu dizkiete “arlo guztietan erabil ditzaten, baita etxeko lanetan ere”. “Ezin dugu jarraitu bizitzak eta familiak suntsitzen dituen basakeria hau onartzen. Leonor beti egongo da gure bihotz eta pentsamenduetan. Gure elkartasun eta babes osoa adierazi nahi diegu bere maiteei, batez ere bere bi alabei. Etxeko langileek behar duten guztirako gurekin konta dezaketela esaten diegu”.
Lanagatik gaurko mobilizaziora joan ezin izan duten etxeko langileek minutu bateko isilunea egin dute euren lanpostuetan, “hildako gure lankidearen oroimenez”. Antxoko mobilizazioan ere isilunea egin dute, eta “justizia!” oihuekin bukatu dute elkarretaratzea.
Atzo espetxeratu zuten hiltzailea, behin-behineko espetxealdian sartzea erabaki du Donostiako Emakumeen Aurkako Indarkeriaren Arloko Epaitegiak, “hilketa delitu batengatik”. Larunbatean atxilotu zuten 53 urteko gizona, Leonor suzko arma batekin hiltzea egotzita, ibilgailu batean ihes egin ondoren.
Jarraian, gaur arratsaldeko mobilizazioan HITZAk ateratako zenbait argazki:
