Euskara argiztatu dute Oiartzunen
Euskararen Nazioarteko Eguna izan zen atzo, eta oiartzuarrak herriko plazan elkartu ziren euskarari babesa emateko asmoz.
Euskararen astea ari dira ospatzen Oiartzunen, eta, atzo, Euskararen egunean, herriko plazan elkartu ziren herritarrak hizkuntzari babesa emateko.
Arratsaldean Lartaun Abesbatzak antolatutako kantujira egin zuten, eta euskaltegietako ikasleek ere parte hartu zuten. “Oso gustura egon ziren ikasleak, abesbatzakoak eta gerturatu ginen oro”, dio Aitziber Arnaiz udaleko Euskara Teknikariak. Euria hasi zuen gero, eta Kontzejupean bildu ziren denak ekitaldiari jarraipena emateko. Zenbait kantu abestu zituzten bertan, eta mugikorretako argiak piztu zituzten herri argazkia ateratzeko.
Euskararen egunari amaiera emateko, Beñat Felipek eta Malen Frantsesenak UEMAk onartutako adierazpena irakurri zuten. “Euskararen biziberritze prozesuak susperraldi egoera bizi izan du azken hamarkadetan, baina badira urte batzuk euskararen egoera bidegurutzean dagoela entzuten hasiak garela. Euskararen gaur egungo egoera zein den ulertzeko Iñaki Iurrebasoren doktore tesiak proposatutako ikuspegi berriak edota Euskaltzaindiaren gogoeta guneak ere argi erakutsi eta adierazi dute jauzi sendoak emateko unea iritsi zaigula. Euskara bi hizkuntza hegemonikorekin talka egoeran dagoen hizkuntza gutxitua izanik, aldeko hizkuntza politikak egin beharra ezinbestekoa da euskarari eutsiko badiogu”.
Eta euskararen aurkako oldarraldia ere izan zuten hizpide atzokoan. “Nabarmendu beharra dugu, joera soziolinguistikoan harago, epaitegietatik ere euskararen aurkako neurriak hartzen jarraitzen dutela. Gure hizkuntzaren aurkako oldarraldian murgilduta jarraitzen dugu. Horri guztiari aurre egiteko, inoiz baino gehiago, euskararen aldeko neurriei tinko heldu behar diegu, eta jauzi handi bat eman norabide egokian. Azken hamarkadetan euskara mantentzeko eta zabaltzeko gai izan bagara, aurrerantzean ere horretan jarraitzeko bizi-indarra izango dugu. Olatu berria sortzeko unea da orain, eta olatu horren eragile izango da Oiartzun ere”.
Oraindik, ordea, ez da amaitu Euskararen astea, hilaren 13ra arte luzatuko baita:
- Abenduak 4, asteazkena
- 17:00. Prosa eta poesia lehiaketaren sari banaketa (Oiartzungo Udala).
- Abenduak 5, osteguna
- Elizalde BHIren festa Madalensoron (Elizalde BHI).
- Abenduak 13, osteguna
- Oiartzun kantuan plazan (Oidultz).
- Kantu pizza autogestionatua (Euskaraldia batzordea). Izen ematea, hemen.
Jarraian, Euskararen Eguneko zenbait irudi.
Euskara plazara dantzara! #EuskararenNazioartekoEguna #oiartzun pic.twitter.com/UqjYwbYibr
— TTUR-TTUR euskaltzaleon bilgunea (@tturttur2002) December 3, 2024
