Lezoarrak, larrialditik indarraldirako bidea egiteko prest
Atzoko Euskararen Egunean euskaraz bizitzeko konpromisoa adierazi zuten lezoarrek. Zailtasunei aurre egin, eta indarrez ekiteko nahia dute.
Euskararen Egunena, euskara kalera Lezon. Arratsalderako antolatu zituzten herriko eragileek egunari lotutako ekitaldiak, Karlos Saldise plazako aterpean. Askaria, Iago magoaren ikuskizuna, bingo musikatua, etxetik eramandakoekin mokadutxoak, eta ekitaldia izan ziren egindakoak. Dozenaka izan ziren Saldisen bildutakoak, haurrak eta helduak. Ekitaldia bukatzeko Euskal herrian euskaraz abestu zuten han izan zirenek, kandelen berotasunean. 365 zifra idatzi zuten, kandelekin, haurrek. Egunero euskaraz hitz egiteko konpromisoa azaldu zieten han ziren guztiei.
Ekitaldiko hizketaldia bi lezoarrek egin zuten. Errota guraso taldea, Euskara Talaia, Lezoko Udal Ludoteka, udala, Piztu Lezo eta AEK izan ziren atzokoa elkarlanean antolatu zutenak, eta haien izenean herriari zuzendu zitzaizkien. Euskaraz bizitzeko dauden zailtasunak aipatu zituzten hizlariek. Baina ezintasunak, ukatzeak eta datu kezkagarriak gaindi, itxaropenerako mezua zabaldu zuten. “Nabarmendu nahi dugu egoeraren kontzientzia hartzea, larrialditik indarraldirako bidea egiteko lehen urratsa dela. Garaiz gaude euskarari eta euskal hiztunen komunitateari etorkizun oparoa bermatzeko”.
Konpromisoa. Euskararen normalizaziorako eta biziberritzerako konpromisoa. Hori irudikatu zuten atzo Saldisen bildutakoek, eta egunerokoan aplikatzeko nahia azaldu zuten. “Ezagutzaren unibertsalizazioan urratsak ematen jarraitu nahi dugu, euskaraz aritzeko eremu erosoak sustatu, euskaraz bizitzeko, euskara transmititzeko, euskara gure egiteko… Baina baita ondokoari oparitzeko eta eskaintzeko ere”; horiek Saldisen izan zirenen konpromisoa. Bide hori egiteko egunerokoan euskaraz aritzearen garrantzia nabarmendu zuten, eta herritarrei euskaltegietara joateko gonbita egin, “herritar berriei euskara eskainiz, euskal kulturaren unibertsora hurbilduz, euskaraz bizitzeko aukera emanez”. 2025eko udaberrian izango da Euskaraldia. Aurretik esandako guztiak berresteko aukera izango dela adierazi zuten hizlariek.
Gaia Lezora ekarrita, Lezo euskaragarri prozesuari aipamena egin zioten. “Euskara lezoar guztiei eskuragarri jarri nahi diegu. Lezo berriro euskaldun izateko ametsa dugula adierazi genuen orain zenbait hilabete. Gizarte eragileok eta udala elkarlanean aritu gara amets hori egi bilakatzeko bide orria marrazten”. Gaur aurkeztuko dituzte, 18:30ean eta Kultura Aretoan prozesuaren ondorioak.
“Bagoaz larrialditik indarraldirako bidea egitera. Euskaraz bizi nahi dugu, eta euskaraz biziko gara. Etorkizuna euskaraz! Piztu ditzagun euskararen argiak. Indarraldirako bidea marka dezagun”, bukatu zuten. Horren ondoren, Euskal Herrian euskaraz kantatzeko tartea hartu zuten Lezoko arratsalde euritsuan, euskararen olatuari indarra emateko prest.
