Antxoko Gure Zumardia elkarrekin diseinatzeko, bilkura irekia
Adinekoekin, nerabeekin eta emakumeekin lanketa berezia egin ondoren, saio irekia egingo dute datorren asteazkenean.
Gure Zumardian egingo dituzte asteazkenetako mobilizazioak. Antxoko Gure Zumardia herritarrekin batera diseinatzeko udalak bilera erronda bat abiatu zuen iragan urrian. Azken hiletan hiru kolektiborekin bildu dira udal ordezkariak, hain zuzen, adinekoen, nerabeen eta emakumeen proposamenak jaso eta haiekin lanketa egin dute. Erronda hori bukatutzat emanda, herritar eta eragile guztiekin saio ireki bat egingo dutela iragarri du udalak. Hilaren 11n (asteazkena da) izango da hitzordua, 18:30ean, elizan.
Mikel Garcia Peñil barrutiko alkateordearen hitzetan, prozesu honetan ere herritar zein eragileen “ahotsa entzutea ezinbestekoa” izango da udalarentzat, “aurretiaz kolektibo zehatzekin landuriko proposamenaren gainean, komunitatea ehuntzen jarraitzeko”, esan du.
Saio ireki honetan, aurreko hiru bilkuretan landutakoa aurkezteaz gainera, etorkizuneko Gure Zumardiak izango duen “izaera” zehazten jarraitzeko “urratsa” egingo dute. “Udaletik, berriro ere, Antxo parez pare duen aukeran jarri nahi dugu azpimarra, etorkizunean bizigarriagoa izango den Antxo elkarrekin birpentsatzeko, hain zuzen ere. Aukera hori baliatzeko, komunitatea batu eta elkarrekin etorkizuneko Gure Zumardia izango dena irudikatzeko ariketan parte hartzera animatu nahi ditugu herritarrak, beraien adina, jatorria edota interesa edozein dela ere”, erantsi du Laura Ré parte hartze zinegotziak.
Irekia izango bada ere, antolakuntza lanak errazteko, asteazkeneko bilerara joateko asmoa dutenei aurrez izena ematera gonbidatu ditu udalak. Horretarako lotura honetara jo beharko dute pasaitarrek, eta bertan dagoen formulario bete. Dena den, norbaitek azken unera arte joaterik izango duen ez badaki, izena eman gabe ere parte hartzeko aukera izango dela argitu du udalak.
