Gabonetan ere, tokiko merkataritzaren alde
Gabonak gainean dira, eta Errenteriako Udalak eta Errenkoalde Merkatari, Ostalari eta Zerbitzuen elkarteak tokiko ekonomiaren aldeko hautua egitera animatu dituzte herritarrak.
Gabonak gainean dira, eta Errenteriako Udalak eta Errenkoalde Merkatari, Ostalari eta Zerbitzuen elkarteak tokiko ekonomiaren aldeko hautua egitera animatu dituzte herritarrak. Atzo, udaleko eta Errenkoaldeko ordezkariek elkarrekin piztu zituzten urtarrilaren 7ra arte herriko kaleak argiztatuko dituzten argi apaingarriak.
Aurten, eremu komertzialetako kaleen Gabonetako argiak berritu ditu udalak, tokiko ekonomia indartzeko xedearekin. Iluminaciones Ximenez enpresa arduratu da argiteria instalatzeaz, eta 63.888 euro bideratu dira zeregin horretara. Argiteriaren %100a kontsumo baxuko LED teknologiako bonbillaz osatuta dago.
Bideo lehiaketako sarituak
Tokiko merkataritzara hurbiltzeko eta bertako merkataritzak Errenteria-Oreretako herri bizitzan eta ekonomian duen balioaz jabetzeko, gazteei begirako bideo lehiaketa bat antolatu dute aurten Errenkoaldek eta udalak.
Orotara, herriko ikastetxeetako 87 ikasle taldek hartu dute parte lehiaketan. Ikasleek azaroan bidali zituzten beren proposamenak, eta atzo jakinarazi zituzten garaileak. Irabazleak merkatariek eta udaleko komunikazio arloko langileek erabaki dituzte. Lanak hiru mailatan banatu dira: DBH 1 eta 2, DBH 3 eta 4 eta Batxilergoa. Maila bakoitzeko sari bat eman du epaimahaiak, eta aparteko beste sari bat eraman du web bitartez publikoaren bozka gehien jaso dituen bideoak.
Epaimahaikideek adierazi zuten aurkeztutako bideoen kalitatea “ona” izan dela, eta “zaila” egin zaiela garaileak erabakitzea. Horrez gain, ikasleen lana eta esfortzua errekonozitu eta ikastetxeen inplikazioa eskertu zituzten. Lehiaketa “arrakastatsua” izan dela aitortu zuten antolatzaileek, eta “gazteek herriko merkataritza ezagutzeko bide eraginkorra dela ikusita”, datorren urtean beste deialdi bat irekiko dutela aurreratu zuten atzo.
Bizi Errenteria bonuak
Bizi Errenteria bonuak erabiltzeko azken egunak geratzen direla gogorarazi zuten udaleko eta Errenkoaldeko ordezkariek. Herritarrek hilaren 11ra arte izango dute bonuak gastatzeko aukera. Aurten, 467.460 euro bideratu ditu udalak Bizi Errenteria kanpainara, “herriaren eta herritarren suspertze ekonomiko zein soziala” bultzatzeko helburuarekin.
