Etxebizitza Mahaia martxan jarri du Errenteriako Udalak
Etxebizitza Planaren jarraipena egiteko balio du mahai horrek eta udal alderdi politiko guztiak daude ordezkatuta. Hilaren 5ean egin zuten lehenbiziko bilera.
Urrian izendatu zuen Errenteriako Udalak hiria Bizitegi Merkatuko Tentsio Eremu. Horretarako, hiru urtera begira balioko duen udalerriaren errealitatearen diagnostiko xehatua ondu zuten eta hainbat lan ildo finkatu zituzten horri esker. Udalbatzako alderdiek ekarpenak egin ahal izan zituzten ere.
Planari jarraiki, udal ordezkaritza duten alderdi guztiek osatutako lan eremua sortu zuten urrian eta gaur jakinarazi dute hilaren 5ean egin zutela lehenbiziko bilera. Elkartze honen asmoa etxebizitzaren bueltan garatzen ari diren ekintzak partekatzea, Etxebizitza Planaren (2024-2027) jarraipena egitea eta ekarpenak biltzea izan da. Bertan izan ziren udalean ordezkaritza duten alderdi politiko guztietako ordezkariak.
Dena den, Bizitegi Merkatuko Tentsio Eremua izateko Espainiako Estatuko Aldizkari Ofizialean argitaratzearen esperoan daude, eta soilik orduan ahalko dute legeak izendapen horren bidez baimentzen dituen tresnak indarrean jarri.
Udalak adierazi du izendapenarekin bakarrik ez dela nahikoa izango “errealitatea iraultzeko” eta beharrezkotzat jo dute Etxebizitza Planeko lan ildoak egikaritzea.
Bide horretan, orain artean hartu dituzten neurri batzuk aipatu dituzte: Eusko Jaurlaritzari lurrak lagatzea Altzaten etxebizitza publikoa eraikitzeko; Fini Rubio adinekoentzako apartamentuen proiektua definitzea; gazteentzako etxe komunitarioaren ordenantza aldatzea hobeto funtziona dezan; hutsik dauden etxebizitzak mobilizatzeko eta turismo ostatuak kontrolatzeko zerga neurri berriak hartzea; edo etxebizitza eraikinen birgaitze integrala egiteko laguntzak ematea Beraun Planaren barruan.
2025ari begira etxebizitza eta birgaitze bulego integral bat sortzea aurreikusi dute. Halaber, gazteen emantzipazioa bultzatzeko udal tresnak berrikusi nahi dituzte, hutsik dauden etxebizitzen azterketa xehatua izateko; udalerri osoan Etxebizitzen Inspekzio Teknikoak eta ondorengo birgaitzeak egitea bultzatzea eta laguntzeko asmoa dute.
