Asteburuko eraso matxista gaitzetsi du Aldundiak
Gipuzkoako Foru Aldundiak "gertutasuna eta elkartasuna" adierazi die biktima, senide eta gertukoei. Emakume eta gizonen arteko berdintasunaren garrantzia azpimarratu dute.
Asteburuan Lezo eta Errenteria artean egondako eraso matxista gaitzetsi du Gipuzkoako Foru Aldundiak, baita biktima eta bere ingurukoei elkartasuna adierazi ere.
Gipuzkoako Emakumeen aurkako Indarkeriari Aurre Egiteko Protokolo Instituzionala jarraituz, Lezoko Udalak plazaratu duen adierazpenarekin bat egin du Aldundiak.
Aldundiak adierazi du eraso matxisten jatorria gizon eta emakumeen arteko berdintasun falta dela, emakumeak “menpean” eta “kontrolpean” nahi baitituzte ideia horiek. Horren aurrean, gizon eta emakumeen arteko berdintasunaren garrantzia azpimarratu dute, baita “duintasuna, sexu-askatasuna eta pertsonaren osotasun fisikoa” ere.
