Kirol elkarteentzako lehen sorospenerako arreta-eskolak
Duela sei urte gehitu zuen Orereta Ikastolak lehen sorospena eskola-curriculumera. Orain, ikasleak kirol elkarteentzako formazio-saioak egiten ari dira.
2018-2019 ikasturtetik jorratzen dute Orereta-Oiartzo Ikastolan lehen sorospenerako arreta eskola-curriculumean, Emergentziak Osakidetza eta EHUko Donostiako Medikuntza eta Erizaintza Fakultatearekin lankidetzan. DBH eta batxilergoko ikasle eta langileek bi urtero formazio-saioak jasotzen dituzte. Gainera, ikastolako eraikin bakoitzean desfibriladore bana dago, egoitza bakoitzak bere ekintza-protokoloa du eta suspertzen ikasteko 30 panpin daude. Lehen sorospenerako arreta curriculumera txertatu duen lehen ikastetxea zen zen, Ikastolaren arabera.
Ikasleak ahalduntzeko helburuz, formazio-saioak jaso ondoren ikasleak bilakatzen dira hezitzaile. Orereta Ikastola eredu, eskualdeko eta Euskal Herriko beste ikastola eta ikastetxe ugari hasi dira lehen sorospenerako arreta eskola-curriculumera gehitzen.
Ikastolako formazio-saioen ondotik, herriko kirol elkarteen txanda ere iritsi da. Elkarteetako zuzendaritzetako kide eta teknikariak ari dira formakuntzak jasotzen orain, tartean Touring KE, Hibaika arraun elkartea, Ereintza eskubaloi taldea, Urdaburu mendizale elkartea, Oarsotri edota CAR. Touring KEko kideek azaroan izan zuten formazio-saioa, eta abenduan jasoko dute Hibaika eta Ereintzak. Gainontzeko kirol elkarteek urtarriletik aurrera jasoko dute.
Lehen sorospenerako arreta formakuntzak egitea Udalari interesgarria iruditzen zaio kirol elkarteek harreman zuzena baitute osasunarekin. Gainera, ikasleak izateak formazio-saioak gidatzen dituztenak ahalduntzean lagundu dezake.
