Sprilur-en eraikin berriaren proiektuari argi berdea eman diote
Eraikinarekin batera, Trintxerpeko sarreran "kalitatezko hiri espazio berri bat" sortuko dutela diote portuko iturriek. Correosen egungo eraikina eraitsi beharko dute lehenik.
Etorkizuneko eraikinak eta eremuak izango duten itxura. Pasaiako Portu Agintaritzaren Administrazio Kontseiluak argi berdea eman berri dio Spri Taldeak etorkizunean Pasaian izango duen eraikin bera eraiki eta ondoan egongo den partzela berritzeko proiektuari. Orotara, 1,6 milioi euroko hirigintza proiektua gauzatuko dute Trintxerpeko sarreran, gaur egun Corresen egoitzaren inguru horretan. Proiektua egikaritzea ahalbidetuko duen hitzarmenari ere argi berdea eman berri diotela jakinarazi du portuak.
Proiektuaren helburu nagusia “kalitatezko hiri espazio berri bat sortzea” dela diote portuko iturriek, “Sprilur (Spri taldean integratuta dagoen Jaurlaritzako Lurzoru Industriala Kudeatzeko Sozietate Publikoa) Herrera inguruan eraikitzen ari den hirugarren sektoreko erabilerako eraikinaren inguruan”. Eraikin berri honetan, besteak beste, Adinberri bezalako proiektuek toki izango dute, eta besteak beste, Ekonomia Urdinarekin lotutako enpresa proiektuak bultzatuko dira bertan.
Urte bukaeran hasiko dira jarduerak. Hauei esker, portuko iturriek gaineratu dute Herrerako Eusko Trenbide Sarearen geltokia eta arrantza lonja berria lotzen dituen oinezko eta bizikleta ardatzaren egungo etena konponduko dutela jarduketa hauekin.
Berrurbanizazioa egin ahal izateko, Trintxerpeko Correosen egungo eraikina eraitsi beharko dute eta lursaila eta inguruko espazioak berrituko dituzte, “kalitatezko espazio publiko bat sortzeko”. Hala, “herritarrei irekitako” 3.000 metro koadroko espazio berri bat izango dute Trintxerpeko bizilagunek. Obrak bukatzean, Correosen bulegoak Sprilurreko eraikin berrira eramango dituzte.
Proiektuaren finantzazioa Portu Agintaritzaren, Gipuzkoako Foru Aldundiaren, Pasaiako Udalaren eta Sprilur-ek hartuko dute beregain, alde guztiek egindako hitzarmen baten ondorioz.
Lanak (4.941 metro koadroko eremua hartuko dituenak) 2026an bukatuko dituzte “beranduenez”, portuko iturriek gaineratu dutenez.
