Adinkideren Eguberrietako zuhaitza, "komunitatearen batasunaren sinboloa"
Hiru metroko zuhaitz bat jarri du gobernuz kanpoko erakundeak Trintxerpeko azokan. Kakorratzez egindakoa da, azken hiru hiletan elkarlanean aritu dira 20 bat emakume.
Adinkide Gobernuz Kanpoko Erakundeak Eguberrietako zuhaitz berezi bat aurkeztu du gaur. Trintxerpeko merkatuan kakorratzez osatutako hiru metroko zuhaitz eder bat jarri dute elkarteko zenbait kidek. Komunitatean, elkarlanean, egindakoa da, eta elkartekoen arabera, “erakundearen izpiritua islatzen du, alegia, sormenaren eta elkarlanaren bidez komunitatea eraikitzea”.
Elkarteak lau urte daramatza jada Pasaian lanean, “elkartzeko guneak sortzeko eta adineko pertsonen gizarte sareak indartzeko helburuarekin”, Blanca Caballero gizarte garapeneko arduradunaren arabera. Adinekoen parte hartze aktiboa sustatzea dute helburu nagusi, “adinarekin lotutako estereotipoak apurtzearren eta zahartzaroaren ikuspegi inklusibo eta positiboagoa bultzatzearren”. 2021ean sortu zuten elkarlanean kakorratzak egiteko taldea, astero biltzen dira San Pedroko jubilatuen etxean. Ehuntzeaz gain, erronka kolektiboak ere badituzte, sormena eta aldarrikapena uztartuz.
Gaurtik merkatua apainduko duen zuhaitza egitea izan da azken hiru hiletako erronka. Irailean ekin zioten proiektuari, 20 bat lagunek parte hartu dute. “Indarrak batuz, proiektu harrigarriak sortze dira”, erantsi du Caballerok.
