Ekonomia zirkularrari buruz hausnartu dute Biratu Foroan
Gaur, hilaren 11n, egin du Oarsoaldeko Garapen Agentziak Biratu Foroa Errenteriako Agustinak Zentroan. Erakunde, enpresa eta iraunkortasunean adituak elkartu dira.
Gaur, hilaren 11n, erakunde, enpresa eta iraunkortasunean adituak elkartu ditu Oarsoaldeko Garapen Agentziak Biratu Foroan. Ehun ekonomikoaren eraldaketak eta jardunbide egokiak partekatzeko espazioa izan da, elkarrizketa eta lankidetza sustatuz.
Gipuzkoako foru Aldundiko Ekonomia Sustatzeko Departamenduak finantzatzen duen Biratu ekimenaren baitan egin da foroa. Eskualdean ekonomia zirkularrera trantsizioa bultzatzeko asmoz, hazkunde ekonomikoa baliabide finituen erabileratik bereizi nahi du proiektuak, praktika jasangarriak, eraginkortasun energetikoa eta hondakinen murrizketari bultzada emanez. Biratuk Oarsoaldeko “enpresa-ehuna sentsibilizatzeko eta ekonomia zirkularra lehentasun estrategiko gisa ezartzeko” aukera ematen du.
Aizpea Otaegi, Errenteriako alkate eta Oarsoaldeko Garapen Agentziako lehendakariak, eta Unai Andueza, Gipuzkoako Foru Aldundiko Ekonomia Sustapen Saileko zuzendariak, eman diote hasiera foruari. Ondotik, Naider aholkularitza enpresak eskualdeko enpresetan zirkulartasun aukerak diagnostikatzeko eta sentsibilizatzeko ekintzak azaldu ditu. Enpresa txiki eta ertainetan zirkulartasuneko tresna pilotuen inplementazioa azpimarratu dute, erreferentzia moduan erabilgarriak. Hainbat enpresetako ekonomia zirkularreko bizipenak aurkeztu dituzte enpresa ezberdinetako ordezkariek: Ondarretako Martina Illarregi, Papresako Lorena Alzaga, Bixigarri Gastrotekako Alex Oier Olarra-Gonzalez, Ekonekeko Markel Alberdi, Merka Oiartzuneko Martin Agirre eta Blue Designeko Xabier Llordesek. Enpresetako ekoizpen prozesuetan praktika iraunkorrak egiten hasteak eduki duen eragin baikorra nabarmendu dute, gainontzeko eragileak bide bera hartzera gonbidatuz.
Networking gunearekin eman zaio itxiera foroari, eskualdeko lau alkate eta beste bertaratutakoek etorkizuneko proiektuei buruzko ideiak trukatu eta elkarlanerako aukerak aztertzeko baliatu zuten. Biratu bezalako proiektuei esker Oarsoaldea ekonomia zirkularrerako trantsizioan erreferente bilakatzen ari da.
