Olibet-Etxeberrietako aparkalekua, 2025erako proiektua
Udalak Olibet-Etxeberriak auzoan aparkalekua bere lurretan eraikitzeko akordioa lortu du udalak Adifekin. 2025ean egitea aurreikusi dute.
Olibet-Etxeberriak auzoan, Renfe tren geltokiaren ondoan, aparkaleku berria 2025ean eraikitzeko proiektua du Errenteriako Udalak. 60 aparkaleku berri eraikitzeaz gain, bi kargagailu elektriko, elbarrientzako bi leku, motoentzako aparkalekua eta bizikletentzako aparkaleku estaliak osatuko dute gunea. Egunean zehar tren geltokia erabiltzen dutenei autoa uzteko aukera emango die; gauean, aldiz, auzokideei aparkatzeko aukera erraztuko die.
Gainera, trenbidearen ingurua hobetzeko lanak egiteko baliatuko dute. Pantailak instalatzea eta horiek begetazioarekin estaltzea aurreikusi du udalak, inpaktu akustikoa murrizte aldera. Zubiaurre kalearekin oinezkoentzako lotura berri eta segurua ere eraikiko dute.
Aparkalekuko lurra Adifena izanik, aparkalekuaren izaera negoziatu behar izan du udalak. Hasieran udalaren asmoa bi solairuko aparkalekua eraikitzea izan arren, analisi teknikoa egin ondoren solairu bakarreko aparkalekua izango zela ebatzi zuen Adifek. Aukera teknikoak aztertu ostean, bi erakundeek akordioa egin dute, eta lurraren lagapenaz gain Adifek 1.000.000 euroko ekarpena egingo dio Udalari.
