Txerri Eguneko ganadu azoka salatzeko instalakuntza bat jarri du AiAk
Larunbatean izango da Txerri Eguna, eta, Oiartzungo AiAk (Aska Itzank Animaliyak) instalakuntza bat jarri du ganadu azoka salatzeko.
Larunbatean (hilak 14) egingo dute Oiartzunen Txerri Eguna, eta ganadu azokan animaliak erabiltzen direla salatzeko instalakuntza bat jarri du Madalensoron Aska Itzank Animaliyak (AiA) taldeak. “Sei orduz hemen lotuta egongo zinateke?” eta “Sei orduz hemen lotuta zuk ongi pasatzeko”, diote AiAkoen pankartek.
“Aurten, tentsioa dagoela eta, erabaki dugu egunean bertan ezer ez egitea. Pertsona batzuk ez dute ikusten azoka horretan animalien tratu txarrik dagoenik, beraz, gure pedagogiaren bidez saiatu gara erakusten zer izan behar duen sei orduz lotuta egotea animalia batentzat”, azaldu dute.
Hots, abenduan hotza egiten duela eta animaliak askotan euritan egoten direla ere salatu dute. “Bereziki haurrentzat plazera izaten da, eta uste dugu sistema honekin pedagogia espezista bat sustatzen dela haurrengan non uste dugun gizakia ez den edozein animalia erabili dezakegula nahi dugunerako eta nahi dugun lekuan”.
AiAk, bestalde, azpimarratu nahi izan du Oiartzunen festa giroan erabiltzen diren 10 animaliatik 7 egoten direla Txerri Egunean; %70, alegia. “Batzuk ez dute ezer txarrik ikusten egun horretan, baina guk bere garrantzia eman nahi diogu”, gehitu dute.
