Asteburuan hasiko dira Eguberriak Lezon
Bihartik (ostirala) izango da zabalik Euskal Liburu eta Disko Azoka. Igandean, berriz, San Tomas festa Karlos Saldisen.
Hurbil da 2024. urtearen bukaera. Beraz, Eguberriak ia-ia hemen dira. Urtero moduan, Lezon ere kalean eta aretoan bizitzeko ekitaldiak izango dira. Horietatik batzuk asteburuan izango dira. Aipagarrienak, bihar (ostirala) zabalduko dutela Euskal Liburu eta Disko Azoka, eta igandean izango dela San Tomas jaia.
Bihartik hilaren 23ra arte jasoko du Kultura Aretoak Lezoko Euskal Liburu eta Disko Azoka. Euskarazko ekoizpenen azken berritasunak eta bestelako asko aurkitu eta erosi ahal izango dira bertan. Zabalera ordutegia goizez 11:00etatik 13:00etara artekoa izango da, eta arratsaldetan 17:00etatik 19:00etara izango da zabalik. 20 eurotik gorako erosketak egiten dituztenek, 6 euroko deskontu bonua jasoko dute.
Igandean, Karlos Saldise plazan, San Tomas jaia. 10:00etan abiatuko da feria eta horrekin lotutako denak: postuak, musika, nahiz zer jan eta edan izango dira. 12:00etan izango da festa guneko ekitaldirik nagusiena: Lezo Herri Eskolako nahiz Pasaia-Lezo Lizeoko ikasleek elkarrekin kantaldia eskainiko diete Saldisera hurbilduko diren guztiei.
Horiez gain, asteburuan badira Lezon bestelako ekitaldiak. Hemen horien zerrenda:
Lezo. Asteburuko ekitaldiak.
- Hilaren 13 eta 14an. Lezo Palestinarekin jardunaldiak. Hemen informazioa.
- Hilaren 13an (ostirala), 17:15ean, Gezala Auditoriumean, Noraren sekretua haurrentzako antzerkia.
- Hilaren 14an (larunbata), 16:30ean, Tomas Garbizu Musika Eskolan, ganbera musika emanaldia.
- Hilaren 14an (larunbata), 17:00etan, Gezala Auditoriumean, Lezoko Zinema Ttikiaren saioa Abentura erraldoia lanarekin.
- Hilaren 15ean (igandea), 19:30ean, Gezala Auditoriumean, Metrokoadroka konpainiaren Zeozertan dabil baina ez dakit zertan antzerkia (irudian).
