Eguraldiak ez du Txerri Eguna zapuztuko
Txerri Egunaz eta ospakizunez gose zirela erakutsi dute gaur zientoka oiartzuarrek. Azokak eta postuak, lepo.
Gaurkoa egun berezia da oiartzuarrentzat, askok urte hasieratik egutegian gorriz seinalatuta zutena. Baserritarren jantzia ipini eta goizetik Txerri Egunaz gozatzera irten dira haur, gazte eta gazte izan direnak. Zientoka lagunek Madalensoro pilotalekua eta Elizalde Ikastetxeko pilotalekua txiki utzi dituzte, Eguberrietako ospakizunez gose zirela erakutsi dute. 14:00ak aldean euria egiten hasi badu ere, ez da aitzakia izan etxean geratu edo festa eteteko.
Txistorra gaurko protagonista nagusietako bat izan bada ere, ez da bakarra izan. 11:30ean hasi da festa, etxeko txikienen gozamenerako, Erraldoi Txikien kale bueltarekin. Jarraian, herriko ikastetxeetako ikasleek dantza emanaldiak eskaini dizkiete haien guraso eta gertukoei. Olarri dantza taldeak ere emanaldi ederra eskaini du beheko plazan.
Bitarte horretan, ateak zabaldu dituenetik, Madalensoroko azoka lepo egon da, herriko artisauen postuetatik ere zientoka lagun pasatu dira, Eguberrietako opariak erosteko egun aproposa da gaurkoa. Eta kanpoko zein Elizaldeko txosnetako boluntarioak ere buru altxa ezin ibili dira, txistorra eta sagardo botilak barra-barra izan dira, eta izango dira. Luze joko baitu gaurko Txerri Egunak.
Ttur-ttur Euskaltzaleon Bilguneak, Intxixu-AEK euskaltegiak, Haurtzaro Ikastolak, Elizalde Herri Eskolak eta Oiartzok elkarlanean antolatu dute gaurko festa, udalarekin batera.
Jarraian eguerdian HITZAk ateratako argazkiak:
