"Pasaitarren bizi baldintzak hobetzeko" asmoz, 21 zuzenketa aurkeztu ditu EAJk
Iragan astean udal gobernuak aurkeztutako aurrekontuari 21 zuzenketa egin dizkiote jeltzaleek, milioi erdi eurotik gorako balioa dutenak.
Iragan astean Pasaiako Udal Gobernuak (EH Bildu eta Podemosek osatutakoa) 2025erako udal aurrekontua aurkeztu zuen, 27,3 milioi eurokoa. Aurrekontu honi “ekarpen egingarri eta errealistak” egiteko asmoz, EAJ taldeak hogei bat zatikako zuzenketa aurkeztu ditu, milioi erdi eurotik gorako balioa dutenak.
Taldeko bozeramaile Loreto Osaren arabera, “legegintzaldia hasi zenetik, oposizio eraikitzailea egingo genuela iragarri genuen, eta horretarako, aukera ematen zitzaigun espazio eta prozesu guztietan ekarpenak egingo genituela”. Jeltzaleen helburua “gure udalerria eta gure herritarren bizi kalitatea hobetzea” dela gaineratu du, eta horregatik, 21. zuzenketa aurkeztu dituztela.
“Proposamen errealistak dira, eta horien bidez inbertsioa lehenetsi dugu, hainbat proiektuk epe ertain eta luzera argia ikus dezaten. Gure zuzenketa guztiak onargarriak dira, EH Bilduk eta Podemosek borondate politikoa badute eta herritar guztien laguntza nahi badute “, esan du Osak. Aurrekontu handiagoa planteatu dute jeltzaleek, “pasaitarron egunerokotasuna hobetzeko oinarrizko partidetan, hala nola zoladurarako edo hiri altzarietarako partidetan, errepideetan eta espaloietan hobekuntzak ezarri eta hiri altzariak ordezkatu ahal izateko, edo haur parkeei buruzkoan, parke horiek berritzen jarraitzeko”.
Sail estrategikoetako partidak handitzea ere proposatu du EAJk, hala nola Gizarte Zerbitzuetakoak eta Berdintasunekoak. “Guztiz beharrezkoa iruditzen zaigu Gizarte Zerbitzuek arriskuan dauden familiekin eta prebentzio komunitarioan egiten duten lana zabaltzea. Eta, era berean, udalerrian dauden puntu beltzen azterketa eguneratu egin behar da; izan ere, azterketa hori gabe, ezin izango dira hartu puntu beltzak ezabatzeko behar diren neurriak, ez eta pasaitarren segurtasuna hobetu ere”, erantsi du bozeramaileak.
Herriko gazteen bakardade egoerak baloratuko dituen azterlan bat ere egitea proposatu dute taldekoek, “nahiz ez diren bakardade egoeren ondorioa prebenitzeko eta arintzeko programa pilotu bat abian jartzea ahalbidetuko duena”. Halaber, partida ekonomiko berri bat sortzea proposatu dute, “udalerriko gazteen etxebizitzen alokairuaren zati bat diruz laguntzeko, emantzipazio proiektuan lagunduz”. Proiektu hau “beharrezkoa eta berritzailea” dela esan du Osak, “Pasaiako gazteei beren bizi proiektua garatzen lagunduko liekeena”.
Bestalde, Izarrakoa bezalako proiektuak eguneratzeari “lehentasuna” eman behar zaiola iritzi dute jeltzaleek. Proiektu honek San Pedroko goiko aldean etxebizitzak eta aparkalekuak eraikitzea ahalbidetuko lukeela gaineratu dute, eta horrez gain, Pabloenea aldean “irisgarritasuna bermatuko” lukeela. Horretarako, plan hau gauzatzea ahalbidetuko duten zuzenketak aurkeztu dituzte. “Badakigu udalerri osoan irisgarritasuna, aparkalekua eta etxebizitzak behar direla, eta horregatik uste dugu proiektu hau abian jartzea funtsezkoa dela herritarren beharrei irtenbideak ematen hasteko”, esan du Osak. Era berean, Donibaneko eskola zaharraren proiektua eguneratzea ere proposatu dute, “bertan gune bat sortuko bailitzateke bai gazteentzat bai udalerriko gizarte eragileentzat”.
Mugikortasunari dagokionez, bizikleta aparkaleku estali bat instalatzea proposatu du taldeak. Eta, “ariketa praktikatzearen bidez bizimodu osasungarria sustatze aldera”, Trintxerpe eta Herrerako geltokia lotzen dituen pasealekuan komun auto garbigarri bat instalatzeko proposamena ere egin dute. San Pedroko gimnasioa, pilotalekua eta beste hainbat eremutan hobekuntzak egiteko zuzenketak ere aurkeztu dituzte.
Bukatzeko, apaindura ordenantza berri bat egiteko partida bat ere proposatu dute, “bide publikoak baldintza onenetan mantentzeko neurri eta irizpide bateratuak ezartzeko” asmoz. “Berriro diogu gure helburu bakarra pasaitarren bizitza hobetzea dela, eta horretarako ezinbestekoa dela jarraibide politikoak alde batera uztea eta desberdinen artean akordioak lortzeko lan egitea. Akordiorako borondate iragarkiak benetakoak diren edo beste eslogana bat gehiago den erakusteko aukera bat dute. Pasaiak pasaitar guztien lankidetzarekin aurrera egin dezan nahi badute, Udal Gobernuak gure proposamenak onartuko ditu”, hitz hauekin bukatu du Osak.
