Asteklimako ekimen hoberenaren saria, Ekiherrirentzat
Euskadiko Klima eta Energia Astea izan zen urriaren 18tik 27ra. Ekiherri Energia Komunitateak 125kWp-ko instalazio fotovoltaikoari buruzko hitzaldia antolatu zuen.
“Euskal gizartea trantsizio energetiko eta klimatikoaren inguruan kontzientziatu eta mobilizatzeko” asmoz, urriaren 18tik 27ra Euskadiko Klima eta Energiaren Astea izan zen, eta bertan parte hartu du Errenteriak. Izan ere, herriko eragileekin elkarlanean egitarau zabaleko energiaren astea antolatu zuen, zinema, antzerki, erakusketa eta hitzaldiekin.
Ekiherri Tokiko Energia Komunitatearen lehen proiektua aurkezteko baliatu zuten energiaren astea, Egiluze ikastetxean egindako hitzaldian 125 kWp-ko instalazio fotovoltaikoari buruzko hitzaldia antolatu baitzuten.
Irabazi asmorik gabeko kooperatiba da Ekiherri, “egungo eredu energetikoa eraldatu nahi duten herritarrek sortua, Energia Berriztagarrien proiektuak garatzeko gaitasuna duena, tokian-tokian, herritarren parte hartzearen bidez. Gaur egun 124 bazkide baino gehiago ditu kooperatibak”.
Hitzaldiari esker, aurkeztutako 114 proiektuen artean, 20.000 biztanle baino gehiagoko udalerriko ekimen hoberenaren saria jaso du Errenteriak, 3.000 euroko saria eskuratuz. “Jasangarritasunaren, klimaren eta energia-trantsizioaren arloko adituek” osatu dute epaimahaia, eta “oso modu positiboan baloratu ditu aurkeztutako ekimenaren kalitatea eta inpaktua”. Klima aldaketari aurre egin eta energia-trantsizioaren sustapenaren aldeko lanagatik nabarmendu da Ekiherri proposamen guztien artean.
Gainera, jasotako proposamenen maila handia nabarmendu nahi izan du epaimahaiak, eta “berrikuntza, konpromisoa eta eraginkortasuna azpimarratu ditu”.
Lankidetza publiko-komunitarioa funtsezkotzat du Errenteriako Udalak “trantsizio energetikoaren erronkari aurre egiteko”. Horregatik, energia astearen baitan antolatutako hitzaldiaz gain, Udalak 110.000 euroko ekarpena egin dio Ekiherriri kooperatiba sortzeko eta “lehen instalazio fotovoltaiko hori egiteko”.
