Pasaiako ludoteka eta gaztelekuak, jardunaldi berezi baten agertoki
Atzo Trintxerpe-San Pedroko ludoteka eta gaztelekuak topaketa berezi baten agertoki izan ziren. Euskal Herriko Unibertsitateak eta Bordeaux-Montaigne Unibertsitateak antolatutako mugaz gaindiko topaketa pedagogikoa egin zuten.
Atzo Trintxerpe-San Pedroko ludoteka eta gaztelekuak topaketa berezi baten agertoki izan ziren. Euskal Herriko Unibertsitateak eta Bordeaux-Montaigne Unibertsitateak antolatutako mugaz gaindiko topaketa pedagogiko bat egin zuten. Ikasleek eta irakasleak izan ziren atzoko topaketaren protagonista nagusiak. Ludotekan eta gaztelekuan izan ziren, Aintzane Taberna alkateordearekin eta Julen Rodriguez zinegotziarekin batera.
“Erreferentziazko unibertsitateetako ikasleak Pasaiara erakartzeak aintzatesten du haur eta gazteentzako politika publikoen arloan egiten ari garen lana”, esan zuen atzoko bisitan Tabernak. “Halako bisitak benetan baliagarriak dira esperientziak, ereduak eta egiteko moduak elkartrukatzeko. Jardunaldi honen bidez, udal-baliabideak inklusiorako eta garapen komunitariorako guneak sortzera bideratzearen garrantzia azpimarratu nahi izan dugu”, erantsi zuen.
Topaketa honetan, eremuak bisitatzeaz eta nola funtzionatzen duten ikusteaz gainera, bi eremuek komunitatearen beharrei nola erantzuten dieten ikusi zuten bertatik bertara. Pasaian egindako lana ikasleentzat eta irakasleentzat “inspirazio iturri” izan dela diote udaleko iturriek, eta bereziki baloratu dutela udalak inklusioarekin eta jokoa oinarrizko eskubide gisa bermatzearekin duen konpromisoa.
Bide beretik jo du Rodriguezek: “Egin dizkiguten galderen artean, nabarmentzekoa da zenbateko garrantzia eman dioten haur eta nerabeek aisiarako duten eskubidea bermatzearren Udaletik egiten dugun lanean. Izan ere, ahalegintzen gara zerbitzu hauen unibertsaltasuna bermatzen, egoera zaurgarrietan dauden familiei euren beharretara egokitutako soluzioak emanez. Haur eta gazte guztien oinarrizko eskubideak baitira gure politiken oinarrian daudenak”.
Bisita hau Bordeleko unibertsitateak bultzatutako gizarte eta hezkuntza proiektu zabalago baten barruan kokatzen da. Honako ardatzak ditu proiektu horrek: iraunkortasuna, jolasa eta tokiko garapena. Bisita honetan ikasleek jokoak lurralde garapenarekin duen harremanaz hausnartu dute, baita ere arrakala sozialak arintzeko espazio publikoetarako sarbide unibertsala bermatzeak duen garrantziaz.
Udalak “oso positibotzat” jo du topaketa, eta “jardunaldi pedagogiko hau urtero errepikatzeko” asmoa agertu du erakundeak, “hezkuntza komunitateen arteko trukerako eta ikaskuntzarako gune gisa sendotuz”.
