Pasaian ere, Eguberriak ate joka
Hilaren 26, 27 eta 28a haurrenak izango dira. Antxon, Donibanen eta San Pedron Gabonetako Haur Jaiak ospatuko dituzte, eta Trintxerpen, berriz, Gabonaldia egingo dute.
Eguberriak ate joka diren honetan, Pasaiako Udalak aurtengo oporraldiko egitaraua aurkeztu du. Lau barrutietako haurrei begirako egitarau oparo eta zabala prestatu dute herriko eragileekin elkarlanean. Antxon, Donibanen eta San Pedron Haur Jaiak egingo dituzte, eta Trintxerpen, berriz, Gabonaldia.
Julen Rodriguez Haur, Nerabe eta Gazteen saileko zinegotziak aipatu du Eguberria “garai berezia” dela haurrentzako, eta “horiei ahalik eta etekin handiena atera diezaioten egitasmo bereziak” antolatu dituztela. Batetik, Gabonetako Haur Jaiaren 31. ekitaldia antolatu dute, hilaren 26tik 28ra Antxon, Donibanen eta San Pedron ospatuko dena. Bestetik. Trintxerpeko haurrek Gabonaldiarekin gozatuko dute, Ekaitza Aisialdi Taldeari esker, hilaren 26tik 28ra bitarte. Hilaren 26, 27 eta 28a, beraz, haurrenak izango dira.
Haur Jaia
Donibaneko Gabonetako Haur Jaiari dagokionez, hiru egunekoa izango da. Hauetan jolasak, tailerrak eta txokolate jana izango dira, besteak beste, ludotekan eta Juanba Berastegi aretoan. Asier Kidam magoa eta Potxin eta Patxin pailazoak ere bertan izango dira.
San Pedrokoa ere hiru egunez luzatuko dute. Ohiko jolas eta tailerrez gain, Kiki, Koko eta Moko pailazoen ikuskizuna edo Txoborro magoaren emanaldi nabarmendu daitezke.
Antxokoa ere bide beretik joango da. Jolas, tailer eta emanaldiez gain, Magic Clowns magoa eta Kuko, Truko eta Bolenwaider pailazoek emanaldia eskainiko diete barrutiko txikienei.
Gabonaldia
Trintxerpeko Gabonaldia ere hiru egunekoa izango da. Gabonetako Haur Jaiaren antzeko bidetik joko du festa honek ere, eta besteak beste, Elvi Sabelhiztunaren eta Zirika Zirkusen emanaldiak izango dira.
Bi festetako, hau da, Gabonaldirako zein Gabonetako Haur Jaiko, jarduera guztiak 16:00etatik 19:00etara izango dira, 4 urtetik gorako haurrei begirakoak. Ekitaldi guztiak doakoak izango direla jakinarazi du udalak.
Egitarau osoa, hemen kontsulta daiteke
