Ttirikittaukiren Kazetaritza tailerraren lehen hilabetea, oparoa
Duela hilabete jarri zuen martxan Elizaldeko Ttirikittauki Euskara Taldeak Kazetaritza tailerra, eta zenbait jarduera egin dituzte dagoeneko.
Ttirikittauki Elizalde Institutuko Euskara Batzordeko zein eskolako komunikazio beharrei erantzuteko asmoz sortu sortu zuten Kazetaritza tailerra. Hilabete egingo da asteon ekimena martxan jarri zutenetik, eta oraingoz taldeak ibilbide laburra badu ere, ez dute denborarik galdu.
Webgune bat sortuz eman zioten hasiera proiektuari, egiten dituzten jarduera oro bertan zintzilikatzeko aukera ematen dien webgune batekin. Eskolako albisteak idazten ditu Ttirikittaukik, eta txoko horretan, besteak beste, horiek zintzilikatzen dituzte. Instagram sare soziala ere badute, eta hura “elikatzen saiatzen” dira. Pinponak –ikasle eta irakasleei galdetegi motzak bideo formatuan– egiten dituzte.
Horretaz guztiaz gain, podcast bat ari da kozinatzen Euskara Batzordea, eta aurreratu dutenez Oiartzungo jende ezaguna gonbidatuko dute bertara. “Momentuz jendea lortzen eta galderak prestatzen ari gara, baina urtarriletik aurrera hasi nahi genuke elkarrizketak egiten”, diote batzorde kideek.
