Olentzero eta Mari Domingi gonbidatu ditu Lau Haizetarak
Hilaren 23an, 23.edizioz Olentzero eta Mari Domingiren etorrera antolatu du Lau Haizetara euskaltzaleen topaguneak. Eguberri ospakizunen bidez haurrei euskara transmititzea bermatu nahi dute.
Hilaren 23rako gonbidatu ditu Lau Haizetara euskaltzaleen topaguneak Olentzero eta Mari Domingi Errenteriara. 17:00etan Maddalen ermitara iritsiko dira, eta arte eskola eta bertso eskolako ikasleek harrera egingo diete. Ondoren, “herritik zehar ibiliko dira, joaldunez, trikitilariez, txistulariez eta bestelako lagunez lagunduta”. Herriko plazara iritsiko dira 18:30 aldera, eta bertso eta dantzaz alaituta “hasiko da gutun ematea”. Gaztainerrea prestatuko dute AEKko kideek, eta “eskutitza Olentzero eta Mari Domingiri eman eta gero gaztainak dastatzeko aukera izango dute bertatik pasatzen diren haurrek”.
Badira 23 urte Olentzero eta Mari Domingiren etorrera antolatzen hasi zirela, eta hainbat aldaketa ezagutu dituzte ibilbidean zehar. Hasieran Olentzero soilik etortzen baldin bazen ere, bada hamarkada bat Mari Domingik ere parte-hartzen duela. Gainera, hasieran “haur gutxi batzuk” batzuk bakarrik hurbiltzen ziren, baina, urteak igaro ahala “indarra hartu zuen egunak” eta “ehun gutunetatik milaka jasotzera heldu zen Olentzero”.
Aurtengo edizioan ere izango dira berrikuntza batzuk. Komitibak aldaketa batzuk izan ditu, “belaunaldi-errelebo naturala jazo” baita eta hilaren 23an bertan nabarituko da aldaketa, “urte luzez gurdi gainean herrira jaitsi diren horiek gaztetu egingo” baitira.
Euskararen aldeko lanketan ere urrats berria egingo dute aurten. Izan ere, azken urteetan “ahalegin berezia” egin dute “hainbat pegatina eta kanpaina zabalduz” eta “egurrezko kartel motibagarriak eta bestelako ekintzak sortuz”. Aurten, furgoneta esaldi nagusi batekin apainduko dute: Oparirik politena, erabiltzen duzun euskara!
Hala ere, kezka adierazi dute antolatzaileek “jaiotze-tasaren jaitsiera nabarmenagatik”. Hamar urtetan 0 eta 8 urte arteko umeak 4.000 izatetik 1.500 izatera pasa dira, eta “ezustekoa” jaso dute Olentzero eta Mari Domingik.
“Inozentziak, ilusioak, maitasuna, pozak, urduritasunak, berotasuna, kezkak, miresmena, nahiak, ametsak… ikus daitezke Olentzero eta Mari Domingi agurtzera hurbiltzen diren txikitxo horien guztien aurpegietan, keinuetan, irribarreetan, begiradetan”, eta horrek Olentzero eta Mari Domingiren “bihotzak betetzen” ditu. Batzordekideak ere “asetuta” ateratzen dira herritarrek eta haurrek eguna gozatzeko aukera dutela ikusten, baina, batez ere “herritarrek euskara bizi” dutela ikusteak.
