2025eko araugintza plana osatu dute udalean
Oiartzungo Udalak hiru ordenantza berri sortzea aurreikusi du. Horretaz gain, indarrean dauden beste zazpi ere eguneratuko dituzte.
Asteazkenean egin zuten Oiartzungo Udalean urteko azken bilkura, eta “aho batez” onartu zituzten bertan landutako puntu guztiak. Beraz, urte berrirako araugintza plana adostu zuten, eta, udalak ohar batean jakinarazi duenez “herriko behar ezberdinei erantzuteko” hiru ordenantza berri egitea aurreikusi dute.
Lehen ordenantza obra txikiak burutzeko aldez aurreko jakinarazpenaren araubidea zehaztuko duena izango da, obra txikiak egiteko egin beharreko administrazio tramiteak errazteko, alegia. Bigarrena bide publikoan terrazak jartzeko ordenantza da, espazio horietan ostalaritza jarduerei lotutako jarduerak garatzerakoan bizikidetza eta erabilera orekatua oinarri izango duten irizpideak zehazteko hain zuzen ere. Eta, azkenik, hirugarren ordenantzak 2025ean martxan jarriko duten udaleko herritarrentzako arreta zerbitzuaren funtzionamendua definituko du.
Horietaz gain, dagoeneko indarrean dauden beste zazpi araudi ere eguneratuko dituzte. Horien artean aurkitzen dira zergei eta aurrekontuei lotutakoa, hondakinen bilketa eta tratamendu zerbitzua xehetzen duena edo Hiri Antolaketako Plan Orokorrarena, Oiartzungo lurretan turismora zuzendutako apartamentu eta etxebizitzak arautzeko, besteak beste.
Gizarte bazterketa eta ekonomia larritasun egoeran dauden norbanako eta familiak diruz laguntzeko deialdi berriaren oinarriak ere aho batez onartu zituzten biltzarrean. Olaia Lasa Ongizate zinegotziak eman zituen 2025ean zehar irekita izango dituzten diru laguntzen xehetasunak. 115.000 euro aurreikusi dituzte, eta laguntza puntualak edo epe bati lotutakoak izango dira horiek. Eguneroko ohiko gastuei aurre egiteko izango dira: janaria, altzariak, argia, alokairua… Gainera, zailtasun egoeran dauden haurrak eta haien familiak laguntzeko beste 30.000 euro gorde dituzte. Adin txikikoen eskolaz kanpoko jarduerak, behar duten ikasmateriala eta gisako beste gastuak ordaintzeko izango dira horiek.
Arditurriren kudeaketarako hitzarmena
Oiartzungo Turismo Aukerak SA udal-sozietate publikoa (OTASA) arduratu da orain arte Arditurriren kudeaketaz. Hots, udalbatzarrean OTASA desegin eta Arditurriren kudeaketa Gipuzkoako Parketxe Sarea (GPS) Fundazioarekin elkarlanean egiteko lankidetza hitzarmena egitea adostu zuten, Gipuzkoako parketxeak irizpide homogeneoen arabera dinamizatzeko. Gipuzkoako bost udalek (Oiartzun, Oñati, Aia, Ataun eta Zegama) eta Gipuzkoako Foru Aldundiak osatzen dute GPS.
Abenduko protokolo gastuak 1.523,13 euro izan dira, jardunaldi, garaikur eta oroigarrietan.
