27,3 milioi euroko aurrekontu "sozial eta eraldatzailea"
2025erako aurrekontua onartu zuten urteko azken plenoan, EH Bildu eta Podemosen aldeko botoekin. Alkateak oposizioaren "borondate falta" salatu du.
Abendu hasieran udal gobernuak aurkeztutako aurrekontua izango du 2025 urte honetan Pasaiak, hain zuzen, 27,3 milioi eurokoa. Urteko azken udalbatzan hartu zuten erabakia, EH Bildu eta Podemosen aldeko botoekin. Udal gobernuko kideen arabera, aurrekontu hauek “sozialak eta eraldatzaileak” izango dira: “kontu horiek ikuspegi sozial, iraunkor eta eraldatzaile nabarmena dute ezaugarri eta berretsi egiten dute EH Bilduk eta Podemosek zuzendutako Udal Gobernuak pasaitarren bizi kalitatea hobetzeko duen konpromisoa”, diote udal gobernuko iturriek.
Aurrekontuak aurrera atera badira ere, Teo Alberro alkateak oposizioaren, hau da, EAJ eta PSE-EE taldeen jarrera deitoratu du, kontra bozkatu baitzuten bi taldeek. Oposizioaren “borondate falta” salatu du: “PSE-EEri 213.000 euroko emendakinak onartzeko prest agertu ginen. Baina hasieratik benetako akordioak lortzeko asmorik gabeko proposamena egin zuten, hordago kutsukoa. Lehen bileran gure proposamena mahai gaineratu genienean argi utzi zuten hori: dena, ala ezer ez”. EAJri dagokionez, Alberrok aipatu du “akordio batera heldu ahal izateko zantzuak” izan zirela hasieratik, eta horregatik “erantzun eskuzabal” bat aurkeztu zietela jeltzaleei: 240.000 euroko proposamena. Halere, “gure harridurarako, ezezko biribila” jaso zutela deitoratu du udal gobernuak.
“Borondate zintzoz eta arduratsuz aztertu genituen euren proposamenak, eta benetako ahalegina egiteko prest agertu ginen, gure aurrekontu proposamena moldatu eta proiektu bateratu baten alde egiteko, uste baitugu hori dela pasaitarrek benetan merezi dutena. Hala ere, horma batekin egin dugu topo, ez EAJk ez eta PSE-EEk ere, ez dute lankidetzarako benetako prestutasunik erakutsi, eta uste dugu immobilismo horrek pasaitarrekiko konpromiso falta islatzen duela. Pena da bi alderdi horiek gure udalerriaren aurrerapenaren alde egin ez izana”, erantsi du alkateak.
Bukatzeko, EH Bilduk eta Podemosek “Pasaia berdinzaleagoa, inklusiboagoa eta iraunkorragoa eraikitzeko” lanean jarraitzeko konpromisoa berretsi dute udal gobernua osatzen duten bi taldeek, “benetako borondatearekin politika aurrerakoiak bultzatzea posible dela erakutsiz”.
