2025eko aurrekontuei osoko zuzenketa aurkeztu die PSE-EEk
Osoko zuzenketa bat eta ia hogeita hamar zuzenketa partzial aurkeztu ditu taldeak, EH Bildu eta Podemosek aurkeztutakoa "eskasa" delakoan.
Crespo, Suarez eta Babaze, gaurko agerraldian. Joan den astean Pasaiako Udal Gobernuak iragarritako 2025erako udal aurrekontuei osoko zuzenketa aurkeztu die PSE-EE taldeak. Ohar bidez jakinarazi dutenez, EH Bilduren eta Podemosen proposamena “eskasa” da, eta “ez die erantzuten Pasaiako beharrei eta erronkei” haien ustez.
Aurrekontuak “pasaitarren zerbitzura egon behar duen tresna izan behar” duela uste dute taldekoek, “guztion eguneroko bizitza hobetzeko helburuarekin”. Udal Gobernuak aurkeztu duena, ordea, “urria” dela iritzi dute, “kontserbadorea eta konformista” dela salatu du Lore Suarez bozeramaileak. “Gure ustez, osoko zuzenketa hau aurkeztea aurrekontu honen gabeziak zuzentzea eta EH Biduren eta Podemosen proposamenak tokiko politiketan aurkezten duen planteamendu aurrerakoi batetik konpromiso faltari aurre egitea da”, esan du Suarezek.
Orain dela urtebete inguru Teo Alberro egungo alkateak “inoizko aurrekonturik handiena” iragarri zuela erantsi du bozeramaileak, “baina, zoritxarrez, Pasaiako historian gutxien gauzatu den aurrekontuan geratu” dela esan du. 2025erako aurkeztutako aurrekontuan 6 milioi euro baino gehiago murriztu direla salatu dute, “2024an baino %20 gutxiago”.
Honako aurrekontuaren alde egin du taldeak: “Pasaiak eta pasaitarrek, aurrera eraman eta tokiko politika bideragarri eta partekatuen alde egingo duen aurrekontu bat merezi dute, Pasaia berdinagoa, solidarioagoa, justuagoa, ez hain zaurgarria, positiboagoa, kanpoko ikuspegiarekin eta proiekzioarekin, itxaropenarekin eta etorkizunarekin, bizigarriagoa eta irisgarriagoa, kohesionatuagoa eta askotarikoagoa eraikitzen duten funtsezko balioetan sakonduko duena.
Udal Gobernuaren aldetik ez dutela proiektu berriak planteatzeko ahaleginik ikusi deitoratu dute taldekoek, eta herritarrei segurtasuna emateko eta erakundeei aurkeztu ahal izateko proiektuak behar dituela herriak. “Pasaiak izaera sozial eta komunitario nabarmeneko politiken aldeko apustua behar du, bere herritarrentzat ekitate handiagoko borondatea definituko duena, eta ez aurkezten duenaren interes eta asmo partikularrak, kasu honetan EH Bildu eta Podemos”.
Zuzenketak
Ia hogeita hamar zuzenketa partzial aurkeztu ditu PSE-EEk, aipatutako osoko zuzenketa horrez gain, milioi bat euro baino gehiagoko balioarekin, “aurrekontua Pasaiako gizarteak eskatzen duen horretan zentratzeko”. Horiei erreparatuta, “izpiritu eraikitzailearekin” aurkeztu dituztela esan du Suarezek.
Zuzenketa horien artean, gizarte eta hezkuntza politiketarako zuzkidura ekonomiko handiagoa nabarmendu du taldeak, “zailtasun ekonomiko handiagoak dituzten familien premiei erantzuteko baliabideak handitu ahal izateko”. Ildo horretan hainbat partida 129.000 euro gehiagotan handitzea proposatu dute, baita tokiko enplegu politika aktiboetan baliabide gehiago inbertitzea, edo tokiko ekonomia babesteko proposatutakoa baino 157.000 euro gehiago inbertitzea.
Aurrekontua handitu behar dela uste du taldeak, “gure espazio publikoen hiri mantentzea etengabe hobetzearen aldeko apustau egiten jarraitzeko”, besteak beste. Horretarako 235.000 euro gehiago bideratuko lituzke taldeak zoladura, haur parte, lorezaintza eta hiri altzarien gastua indartuz.
Kulturari eta hezkuntzari lotutako proiektuetan 147.000 euro gehiago inbertitzea ere jaso dute aurkeztutako zuzenketa horietako batean.
Bukatzeko, Izarrak San Pedro duen espazioa, aparkalekua edo etxebizitzaren arazoari zein gazteleku berria egiteko proiektuei “berehala ekitea beharrezkotzat” jo dute taldekoek. Horri lotuta, beste proiektu batzuk ere proposatu dituzte, tartean, Trintxerpeko kultur beharrei erantzuteko Ziriza Etxearen erabilera bultzatzea edo San Fermin eliza definitzea Antxoko espazio eszeniko berriak aztertzeko aukerari erantzunez. Antxon kirol anitzeko espazio estali bat aztertzeko eta San Pedron nautikako planetarioa berreskuratzeko proposamenak ere egin ditu PSE-EEk.
