Zazpi ibilgailu elektriko erosi ditu udalak karbono aztarna gutxitzeko
Hainbat zerbitzutarako bi moto, auto bat, hiru furgoneta eta hondakinak jasotzeko kamioi txiki bat erosi dute erregai fosilen erabilera murrizteko.
Trantsizio ekologikoan pauso berri bat emateko asmoarekin, Oiartzungo Udalak zazpi ibilgailu elektriko erosi ditu; 127.000 euroko inbertsioa egin dute.
Zenbait zerbitzutarako bi moto, auto bat, hiru furgoneta eta hondakinak jasotzeko kamioi txiki bat erosi dute “erregai fosilen erabilera murriztu eta udal zerbitzuek sortzen duten karbono aztarna gutxitzeko”.
2024an onartu zuen udalak herri jasangarriagoa izateko lehen Klima eta Energia plana, eta 2030erako berotegi efektuko gas isurketak %40 murriztu eta hondakin kopurua %15 jaistea da udalaren helburu nagusia. Klima aldaketa arintzen laguntzeaz gain, udalak energia trantsizioan eredugarri ere izan nahi du. Ondorioz, horretarako aurreikusi dituzten 64 ekintzetako bat da zahartzen doazen udal ibilgailuak elektriko eta hibridoekin ordezkatzen joatea.
Bide horretan, udalak sistema integral bat jarri du martxan ibilgailu horiek kargatzeko erabiltzen den energia berriztagarria erabiltzeko. Beraz, Arrietako ur deposituan jarri zituzten eguzki plakek sortzen duten energiarekin eta beste instalakuntza berriztagarriekin elikatzen dira ibilgailu horiek.
Erregai fosilen erabilera murrizteaz gain, neurri horiekin administrazio publikoek klima aldaketaren aurkako borrokan eta teknologia garbien sustapenean “funtsezko rola” dutela adierazi du Agustin Lekuona Hirigintzako zinegotziak. “Guztiontzako etorkizun berde eta osasuntsuago bat eraikitzeko konpromisoa dugu”. Bestalde, nabarmendu du ibilgailu elektriko horiek erostea ez dela soilik teknologian egindako inbertsioa. “Gure herriaren eta lurraren ongizatean egindako apustua da. Erantzukizunaren eta lidergoaren adibide izan nahi dugu trantsizio energetikoan”.
