Ikastetxe publikoen matrikulazio kanpaina aurkeztu dute
Otsailaren 3tik 14era bitarte izango da zabalik kanpaina. 2022 eta 2023 urteetan jaiotako haurrei zuzenduta dago, eta ate irekien jardunaldiak antolatu dituzte gurasoak informatzeko.
Ezkerretik eskuinera: Itsaso Cruz, Aitor Sarasua, Amaia Jauregi eta Maria Barbado. Errenteriako Udaleko Hezkuntza saileko zinegotzi Itsaso Cruz, eta herriko ikastetxe publikoetako zuzendariak (Koldo Mitxelena ikastetxetik, Amaia Jauregi Somoza; Bizirain Ikastolatik, Maria Barbado Bobillo; eta Cristobal Gamonetik, Aitor Sarasua Manso) elkartu dira gaur 2025-2026 ikasturteko matrikulazio kanpaina aurkezteko. Kanpaina 2022 eta 2023 urteetan jaiotako haurrei zuzendua da, eta gurasoak informatzeko ate irekien jardunaldiak antolatu dituzte, datorren astelehenetik (hilaren 20) hasita hilaren 30era bitarte. Matrikulatzeko kanpaina otsailaren 3tik 14era bitarte izango da.
ATE IREKIEN DATAK ETA ORDUTEGIAK:
- BIZARAIN IKASTOLA – Juan Crisostomo Arriaga (Bizarain txiki) eraikinean: Hilaren 20an 17:00etan (euskaraz), eta hilaren 28an 17:00etan (gaztelaniaz).
- CRISTOBAL GAMON – Sorgintxulo, 6ko eraikin nagusian: Hilaren 20an, 16:30ean eta urtarrilaren 21ean, 17:30ean. Aurkezpen bilera orokorra: hilaren 24an, 16:30ean. (Sorgintxulo, 6)
- KOLDO MITXELENA – Olibet eta Markola eraikinetan, hilaren 29 eta 30ean, 17:00etan.
Ikastetxe publikoek eskaintzen duten hazkuntza euskalduna, publikoa eta kalitatezkoa dela nabarmendu du Cruz zinegotziak. Ikastetxeen ardatza euskara izanik, irakasleak formatzen dihardutela adierazi du (ahozkotasuna lantzen, adibidez) Jauregik; eta eskola “feminista, laikoa eta langilea” osatzen dutela gaineratu. Sarasuaren hitzetan, urtero-urtero berrikuntzak inplementatzeko lan egiten dute, haur hezkuntzaren kasuan, “mugimendu autonomoa” txertatzen, esaterako. Aniztasunaren gaiari helduz, azken urteotan oso ikastetxe anitzak bihurtu direla, eta aniztasuna aberastasun bezala ulertzen dutela nabarmendu du Cristobal Gamoneko zuzendariak, ikasle guztiak zainduta sentitu daitezen espazio seguruak sortzeko apustuari helduz. Barbadok, berriz, hiru ikastetxeetan ikasleen ongizate eta integrala sustatzen dutela adierazi du, alor guztiak kontuan izanik.
Ikastetxe guztietan, ikasleek DBH ere zentroan bertan egiteko aukera izango dute, 2 urtetik 16 urtera arteko formakuntza eskaintzen baitute.
Ikastetxeen inguruko informazioa postaz iritsiko da 2022 eta 2023 urteetan jaiotako eta Errenterian erroldatuta dauden 414 haurren etxeetara.
