Gazteek sexologia aholkularitza zerbitzu berria izango dute
12 eta 17 urte bitarteko gazteentzat da aholkularitza zerbitzua. 'Gozagune' du izena, eta Topalekuan dago. Lehen hitzordua hilaren 23an da.
12 eta 17 urte bitarteko gazteentzat sexu aholkularitza zerbitzua jarri du martxan udalak Topalekuan. Gozagune du izena, eta sexualitatea eta harreman afektibo-sexualen inguruko zalantzak lantzeko “konfiantzazko espazio seguru eta konfidentziala” eskainiko dute. Sexologiako adituek emango dute zerbitzua, eta helburua “harreman aske eta osasuntsuak” sustatzea da. Nora Velez del Burgo feminismo zinegotziak eta Olaia Lasa ongizate zinegotziak azaldu dutenez, “tabuak eta beldurrak uxatuz” norbere gorputzarekiko harreman positiboa lantzen da.
Saio horiek banaka, bikoteka edo lagun talde txikitan egiten dira, eta zalantzak argitzeko edo informazioa emateko balia daiteke. Adinaren arabera egokitutako arreta zerbitzua izango da: sexu heziketa eman; gorputza ezagutu, onartu eta maitatzen ikasi; identitatea, desioa eta plazeraren inguruan jakin nahia ase; bikote eztabaidak eta jeloskortasuna kudeatu…
Hilean bitan emango dute zerbitzua, ostegunetan, 17:30etik 19:30era.
Zerbitzua emango duten egunak:
- Urtarrila
- Hilak 23.
- Otsaila
- Hilak 6.
- Hilak 20.
- Martxoa
- Hilak 6.
- Hilak 30.
- Apirila
- Hilak 3.
- Maiatza
- Hilak 15.
- Hilak 22.
- Ekaina
- Hilak 12.
- Hilak 26.
