Landa lurrak erosteko prozedura abiatu du udalak
Lurren erosketarako 25.000 euro bideratu ditu udalak, eta hektarea bakoitzeko 3.500 euroko prezioa finkatu dute.
Oiartzungo espezie, baso eta ekosistemen kontserbazioa indartzea zein bioaniztasunaren galera geldituko dituen politikak sustatzea dira Oiartzungo Udalaren helburuetako batzuk. Kontserbaziorako ekintzak eta bestelako egurgintza eredu baten aldeko praktikak jarri dituzte martxan. Hots, landalur izaerako lursailak erosteko prozedura abiatu dute, eta proposamenak otsailaren 12ra bitartean aurkeztu daitezke.
Herrian dauden basoak, landatutako basoak, ibaiertzeko basoak, zuhaixkak edota sastrakadiak erosi nahi dizute, eta martxan jarri berri duten prozedurarako 25.000€ bideratuko dituzte. Ildo horretatik, lur pribatuak publifikatu eta basogintza eredu ekologikoa zein bertako bioaniztasuna berreskuratzeko ekimenak sustatuko dituzte udaletik.
Eskaintzen diren lursailek gutxienez hektarea bateko azalera izan beharko dute baldin eta jabetza erregistroan berezitako finka gisa jasota ez badago; udalaren jabegoko lursail batekin mugakide ez bada eta proposatzen diren beste lursail batzuekin mugakide izanik horiekin batuta hektarea bat baino azalera handiagoa osatzen ez badute. Hala ere, edozein kasutan, bereizten den lur zatiaren finka nagusiak hektarea bat baino gehiagoko azalera izan beharko du. Gainera, eskaintzen diren lursailak mota guztietako kargetatik libre egon beharko dute eta jabeak gastu, zerga eta erkidego kuota guztien ordainak egunean izan beharko ditu.
Hektarea bakoitzeko 3.500 euroko prezioa finkatu dute; hortaz, lizitaziora aurkezten diren eskaintzak prezio horren pareko edo azpiko proposamenak izan beharko dute. Lizitatzaile bakoitzak nahi beste lursail aurkezteko aukera izango du, baina finka bakoitza indibidualki baloratuko da. Eskaintza ekonomikoaz gain, batasunaren intereseko habitatak, ingurumen babeserako sailkapena, herriko ur sareari egiten zaion ekarpena, lursailaren azalera eta udalaren jabetzako lursailekiko hurbiltasuna baloratuko dituzte. Jasotako puntuazioaren araberako zerrenda osatuko da, udal aurrekontuetan dagoen diru atala agortu arte.
Edozein zalantza argitzeko edo informazio gehiagorako telefono honetara deitu behar da: 943 49 01 42.
