Hiru emanaldi aurtengo Kontu Kantarin
Iazkoaren arrakasta ikusita, formatua berreskuratu du Pasaiako Udalak. Lehen emanaldia otsailaren 1ean izango da. Esti eta Mikel Markez igoko dira San Pedroko Udal Aretoko oholtzara, 19:00etan.
Iazko arrakastaren ondoren, bueltan da Kontu Kantari, Pasaiako solasaldi musikatuak egitasmoa. Udalak, momentuz, hiru emanaldi iragarri ditu, eta iragan ostiralean aurkeztu zituzten iniziatibaren gako nagusiak Aitor Brion Pasaiako Udaleko Kultura eta Ondareko zinegotziak, Beatriz Caballero Kultura teknikariak eta Alazne Mendikute kultur dinamizatzaileak. Egitasmoaren formatuari dagokionean, artisten kantak entzuteaz gain, solasaldia egiten da haiekin, aurkezle batek dinamizatuta.
Kontu Kantariren lehen emanaldia otsailaren 1ean izango da, larunbat honetan. Esti eta Mikel Markez igoko dira San Pedroko Udal Aretoko oholtzara, 19:00etan. Oihana Maritorena aktoreak aurkeztu eta bideratuko du solasaldi musikatua.
Bigarren saioa martxoaren 9an izango da. Gontzal Mendibil izango da protagonista, eta Donibaneko Bonantza elizan izango da emanaldia, 19:00etan. Musikan aditua eta komunikabideetan kolaboratzailea den Marta Garciak zuzenduko du saioa.
Azken emanaldia apirilaren 27an izango da, eta Idoia Asurmendik itxiko du aurtengo Kontu Kontari. Bere emanaldia San Pedroko Udal Aretoan izango da, 19:00etan. Eider Perez aktore eta idazleak aurkeztu eta bideratuko du azken saioa.
Emanaldi guztien sarrerak eskuragarri daude jada Bibe plataforman, 5 euroan.
