Otsailaren 28ra arte eska daitezke hobariak tasetan
Udalak jakinarazi du egoera zaurgarrian dauden familiek ez dituztela hondakinen eta ur zein estolderiaren tasak ordaindu beharko.
Zergen eta tasen egutegia etxez etxe ari da banatzen Oiartzungo Udala, herritarrek jakin dezaten tributu ezberdinen kitapena zein epetan egin behar den. Udalak eskaintzen dituen zerbitzuen %50 finantzatzen da herritarrek ordaintzen dituzten zergekin.
Egoera ekonomiko zaurgarrian dauden herritarrak laguntzeko asmoz, azken urteetan fiskalitate justuagoa lortzeko hartutako neurriak proposamen berriekin indartu ditu udalak, eta, besteak beste, diru sarrera gutxi duten familiek ez dute hondakinen eta ur zein estolderiaren tasa ordaindu beharko.
Hala ere, lau baldintza bete behar dituzte salbuetsia egoteko: Oiartzunen erroldatuta egotea; zehaztutako diru sarrera kopurua –bizikidetza unitateko pertsona kopuruaren eta Langile Arteko Gutxieneko Soldataren arabera jarri dituzte mugak– eta ondare maila ez gainditzea; bigarren etxebizitzarik ez izatea; eta udalarekin zorrik ez izatea edo ordainketa plana onartuta eta egunean edukitzea.
Udalak ikerketa bat egin du herrian, eta emaitzen arabera Oiartzunen 3.975 familia daude –kide bakarreko familiak barne–; horietatik 100 familia daude “bereziki egoera zaurgarrian”. 50 etxetan bi adingabe edo gehiago dituzte eta 13.501 – 26.000 euro arteko errenta dute.
Egoera horren aurrean, Joana Mendiburu Oiartzungo alkateak badu zer esana. “Udal gobernuaren nahia da Oiartzun herri justua eta kohesionatua izatea, eta horretarako ezinbestekoa da egoera zaurgarrienei erreparatzea eta hobarien bitartez ahal dugun laguntza guztia eskaintzea”.
“Udalak aspalditik aplikatzen ditu hobari sistemak, eta horri esker azken urteetan 94 familia egon dira uraren eta hondakinen tasetatik salbuetsita”, jarraitu du Olaia Lasa Ongizate zinegotziak.
Hilaren 2an zabaldu zuten hobari hori eskatzeko epea, eta otsailaren 28ra arte egongo da irekita. Eskaerak udaleko arreta bulegoan edo egoitza elektronikoaren bitartez egin daitezke. Alabaina, informazio guztia hemen aurki daiteke.
Azkenik, udaletik jakinarazi dute familiaren batek beste urteren batean egin badu eskaera, berriz aurkeztu behar dela.
