Martxan da Kontu Kantari
Esti eta Mikel Markez San Pedroko Udal Aretoan izan ziren larunbatean. Hurrengo saioa martxoaren 9an izango da, Donibanen, Gontzal Mendibilekin.
Bueltan da Kontu Kantari, Pasaiako solasaldi musikatuak egitasmoa. Larunbatean hasi zen iniziatibaren denboraldi berria Esti eta Mikel Markezen kontzertuarekin. Markeztarrek San Pedroko Udal Aretoa musika doinuez bete zuten, eta emanaldiaren ondoren Oihana Maritorena aktorearekin hitz egiteko aukera izan zuten. Esti eta Mikelen kontzertua iazko abenduaren 1ean egitekoa zela gogorarazi du udalak, baina aurreko eguneko hilketa matxistagatik bertan behera geratu zen emanaldia. Larunbateko saioan emakumeei omenaldi bat egin zieten Konplize ditut eta maite ditut denak kantuarekin.
Kontu Kantari zikloaren barruan, beste bi kontzertu iragarri ditu udalak. Hurrengo saioa martxoaren 9an izango da. Gontzal Mendibil izango da protagonista, eta Donibaneko Bonantza elizan izango da bere emanaldia, 19:00etan. Musikan aditua eta komunikabideetan kolaboratzailea den Marta Garciak zuzenduko du saioa.
Azken emanaldia apirilaren 27an izango da, eta Idoia Asurmendik itxiko du aurtengo Kontu Kantari. Bere emanaldia San Pedroko Udal Aretoan izango da, 19:00etan. Eider Perez aktore eta idazleak aurkeztu eta bideratuko du saioa.
Emanaldi guztien sarrerak eskuragarri daude Bibe plataforman, 5 euroan.
