Oiartzungo Gizon Foroa abian da
Oiartzungo Gizon Foroa antolatu dute, Hiruki Larroxa elkartearen bidelaguntzaz. Lehenengo saioa hilaren 11n izango da, 18.00etan, Arizmendienean.
Oiartzungo Gizon Eskolak hiru urteko bidea egin ostean, Oiartzungo Gizon Foroa jarri dute abian, gizonen deseraikitze prozesuan aurrerapausoak emateko xedez. Antolakuntzatik Eñaut Retegik adierazi duenez, foroak “irekiagoa eta askeagoa” nahi du izan. Saioetan parte hartzeko ez dago izena eman beharrik eta ez da zertan konpromiso jarrai bat izan. Beraz, edonor joan daiteke nahi duenean. Hiruki Larroxa elkartea izango da tartean bideratzaile, giroa berotu eta partaideen artean hausnarketa sustatzeko.
Zabaldu duten kartelak mezu argi bat helarazten die interpelatuta sentitu litezkeen gizon askori: “Kuadrillako jarrerek, indarkeria matxistak, homofobiak, pribilegioek, ezintasun emozionalak, aitatasunak, harreman afektiboek, gatazkak kudeatzeko ezintasunak, hazkuntzak… kezkatzen zaituzte?”.
Retegiren esanetan, “egunerokoan oso gertutik bizi dugu matxismoa, gure inguru, lagun-arte eta familian, eta askotan ez dakigu zer egin detektatzen ditugun jarrera horiekin, ez ingurukoengan ez geure buruarengan detektatzen ditugunekin. Autobiluzteko gune seguru bat sortu nahi dugu, elkarrekin eztabaidatu eta hausnartzeko; parte hartzaileek ekartzen dituzten ezin-egonekin nola jokatu lantzeko, deseraikitzeko prozesu honetan elkar zaintzatik pauso bat aurrera emanez”.
Lehenengo saioa hilaren 11n izango da, 18.00etan, Arizmendienean (Aialde kalea, 3). Asmoa hil honetatik abendura bitarte jarraitzea da (abuztua salbuetsita), hilabeteko 2. asteartetan, ordu berean.
