Kirola demokratizatzea xede
Aurten, Pasaian gauzatu dituzte Gipuzkoako kirol teknikarien urteroko jardunaldiak. Jorratu dituzten gaiak "kirol politiketan aurrera egin eta komunitate aktiboagoa eta osasuntsuagoa eraikitzeko funtsezko elementuak" direla adierazi du Julen Rodriguez kirol zinegotziak.
Donibaneko Juanba Berasategi aretoan bildu dira gaur goizean zehar Gipuzkoako hainbat kirol teknikari, urteroko Gipuzkoako kirol teknikarien jardunaldiari jarraiki.
Hainbat gai aztertu dituzte, esaterako, Kirol Orientazio Zerbitzua (KOZ) eta Multikirol programa. Julen Rodriguez kirol zinegotziak, KOZ-ren baitan egiten ari diren Pasaia Badia Aktiboa egitasmoa nabarmendu du, “jarduera fisikoa herritar guztientzat eskuragarri jartzeko funtsezko zerbitzua” dela azpimarratuz, “kirolaren demokratizazioa” helburu.
Gipuzkoako udal kirol instalazioen hitzarmenaz ere aritu dira, eta udal kirol arduradunen sarea aztertu dute, teknikarien arteko harremana eta ezagutza indartzeko asmoz.
Bestetik, Eskola Kirolaren eredua defendatu dute, haurrei askotariko mugimendu-trebetasunak garatzeko aukera eskaintzen diela adieraziz.
Rodriguezek gaineratu duenez, “kirola ez da soilik jarduera fisikoa; pertsonak batzen dituen, bizikidetza sustatzen duen eta gizarte osasuntsuagoak eta orekatuagoak eraikitzen laguntzen digun hizkuntza unibertsala da. Horregatik, uste dugu ezinbestekoa dela prestatzen jarraitzea eta bide berriak irekitzea, gero eta bidezkoagoak diren kirol-ereduetara hurbiltzeko, kirol-jardueraren bidez berdintasuna, inklusioa eta balioen ikaskuntza sustatzeko”.
